Прэм’ер-міністар Чарнагорыі Душка Маркавіч назваў «нецывілізаваным» пратэст футбольных заўзятараў каля будынку чарнагорскай амбасады ў Бялградзе і спробу падпалу чарнагорскага сьцяга.
«Учора ўвечары ў Бялградзе [меў месца] яшчэ адзін нецывілізаваны напад на амбасаду Чарнагорыі і чарнагорскі сьцяг. Уражвае стаўленьне сэрбскай улады. Чарнагорыя зноў стаіць перад выклікам абароны незалежнасьці і свабоды. Захаваем нашу Чарнагорыю насуперак нянавісьці, якою яе напаўняюць тыя самыя дзеячы ўнутры яе і за яе межамі!», — напісаў Маркавіч у сваім твітэры 3 студзеня.
Sinoć u Beogradu još jedan necivilizacijski atak na Ambasadu CG i CG zastavu. Zaprepašćujući je odnos vlasti Srbije. CG je još jednom pred izazovom odbrane nezavisnosti i slobode. Sačuvaćemo našu Crnu Goru uprkos mržnji kojom je zasuta od istih aktera unutar i van njenih granica! pic.twitter.com/f2ECg7zsE9
— Duško Marković (@DuskoMarkovicCG) January 3, 2020
2 студзеня заўзятары бялградзкага футбольнага клюбу Crvena Zvezda перад амбасадай Чарнагорыі ў Бялградзе арганізавалі пратэст супраць прынятага нядаўна ў Чарнагорыі закону аб свабодзе веравызнаньня, падчас якога паспрабавалі падпаліць сьцяг на чарнагорскай амбасадзе пэтардамі.
У сувязі з гэтым інцыдэнтам Міністэрства замежных справаў Чарнагорыі выклікала на размову сэрбскага амбасадара ў Подгарыцы.
ГЛЯДЗІЦЕ ТАКСАМА: Прэзыдэнт Чарнагорыі падпісаў закон аб свабодзе веравызнаньня, які выклікаў пратэсты сэрбаўЧарнагорскі закон аб свабодзе веравызнаньня прадугледжвае, сярод іншага, што ўсе рэлігійныя аб’екты на тэрыторыі Чарнагорыі, якія былі збудаваныя або набытыя з публічных даходаў дзяржавы або былі ў дзяржаўнай ўласнасьці да 1 сьнежня 1918 году, абвяшчаюцца ўласнасьцю дзяржавы і часткаю культурнай спадчыны Чарнагорыі — калі ня будзе пацьверджанае іншае права ўласнасьці. Як ацэньваецца, у выніку дзеяньня гэтага закону Сэрбская праваслаўная царква можа пазбавіцца ўласнасьці на 650 цэркваў.