Кансэрватыўная партыя на чале з прэм’ер-міністрам Борысам Джонсанам упэўнена перамагла на датэрміновых выбарах Палаты абшчын, паказаўшы лепшы вынік за сучасную гісторыю партыі.
Пасьля падліку 99,5% галасоў, партыя атрымала 361 з 650 месцаў у Палаце абшчын. Галоўныя супернікі кансэрватараў, лейбарысты пацярпелі поўную паразу, атрымаўшы па апошніх дадзеных, толькі 203 мандаты.
Посьпеху дасягнула Шатляндзкая нацыянальная партыя, якая атрымала 48 мандатаў. Лібэральна-дэмакратычная партыя атрымала толькі 11 мандатаў, паўночнаірляндзкая Дэмакратычная юніянісцкая партыя — 8, Партыя Ўэльса — 4, Зялёныя — 1, паведамляе BBC.
Партыя Джонсана мае намер неадкладна ратыфікаваць пагадненьне аб выхадзе Вялікабрытаніі з Эўразьвяза і пакінуць супольнасьць 31 студзеня 2020 года.
ГЛЯДЗІЦЕ ТАКСАМА: Brexit і яго наступствы. Тлумачым тым, хто ўжо заблытаўся і не разумее, што адбываеццаКансэрватары атрымалі большасьць у мностве былых рабочых акругаў, паведамляе Бі-бі-сі, дзе выбаршчыкі традыцыйна галасавалі за лейбарыстаў, але на рэфэрэндуме ў 2016 годзе галасавалі за Brexit.
Лепшае дасягненьне супернікаў Brexit на галасаваньні — перамога Шатляндзкай нацыянальнай партыі ў 48 з 59 акругаў краіны. Партыя настойвае на новым рэфэрэндуме аб незалежнасьці Шатляндыі, заяўляючы, што яе выбаршчыкі з ЭЗ выходзіць ня хочуць.