Суд Першамайскага раёну пакараў актывіста «Эўрапейскай Беларусі» Леаніда Кулакова за нясплачаны штраф. Кулакоў атрымаў штраф у красавіку за ўдзел у малебне каля Катэдральнага сабору.
Справу актывіста разглядаў 11 сьнежня Першамайскі суд Менску з ініцыятывы Першамайскага аддзелу прымусовага выкананьня.
Судзьдзя Вольга Багам’я зачытала складзены на Леаніда Кулакова пратакол, выслухала яго тлумачэньні і абвесьціла пастанову.
«Абмежаваць грамадзяніна РБ Леаніда Кулакова ў праве кіраваньня мэханічнымі транспартнымі сродкамі да пагашэньня запазычанасьці адпаведна выканаўчаму дакумэнту суду Цэнтральнага раёну ад 24 красавіка ня больш як на 5 гадоў», — працытаваў актывіст пастанову суду. Кулакову таксама часова абмежаваны выезд з Беларусі ды забаронена наведваць гульнявыя ўстановы.
«Я зьдзівіўся: як так, а куды ж я буду ўкладаць свае заробленыя за часы змаганьня за дэмакратыю мільёны? Спытаў судзьдзю, ці дазволена мне хаця б наведваць публічныя дамы. Не атрымаў адказу», — згадаў пра суд Леанід Кулакоў.
Леанід Кулакоў сказаў, што ня ведае, як аплаціць штраф у 1147,5 рубля. Нядаўна ён атрымаў яшчэ адзін — на 1275 рублёў, за «Сход вольных людзей — 2», які адбыўся 16 лістапада.
«Жыву на грошы, заробленыя дробнымі паслугамі»
«Часам на ежу не хапае», — прызнаўся актывіст.
Ужо паўтара года Леанід Кулакоў ня мае магчымасьці працаваць таксістам. Ён быў звольнены з працы, а ягоны аўтамабіль трапіў на штраф-стаянку. За гэты час актывіст спрабаваў працаўладкавацца ў іншыя месцы, але безвынікова.
«Мяне не ўзялі на працу кантралёрам грамадзкага транспарту. Я думаў, што прычына толькі ў маёй палітычнай актыўнасьці. Бо начальнік управы пры асабістай сустрэчы мне гэтак і сказаў: „Як ты будзеш правяраць іншых, калі цябе самога ўвесь час штрафуюць?“. Але калі мяне не ўзялі наладнікам на гадзіньнікавы завод, потым на завод шасьцерняў, дык цяпер, я мяркую, дыскрымінацыя ёсьць і па ўзросьце, бо мне ўжо 60 гадоў», — кажа Леанід Кулакоў.
Актывіст зьбіраецца абскардзіць рашэньне ў Менскім гарадзкім судзе.
11 сьнежня Першамайскі раённы суд разгледзеў справу актывісткі Вольгі Мікалайчык, у якой таксама ёсьць запазычанасьці па штрафах. Паводле Леаніда Кулакова, Вользе Мікалайчык да сплаты штрафаў абмежавалі выезд за межы Беларусі.
ГЛЯДЗІЦЕ ТАКСАМА: За ўдзел у перадвыбарчых мітынгах актывістам прысудзілі штрафы да 1250 рублёў