У Дружкаўскім гарадзкім судзе Данецкай вобласьці абвясьцілі абвінаваўчы акт грамадзяніну Беларусі Дзьмітрыю Новікаву. Ён быў затрыманы 10 жніўня 2018 году на падкантрольнай Кіеву тэрыторыі Ўкраіны за ўдзел у баявых дзеяньнях на баку гэтак званай «Данецкай народнай рэспублікі».
Дзьмітры Новікаў абвінавачваецца ў злачынствах паводле трох артыкулаў Крымінальнага кодэксу Ўкраіны:
- стварэньне тэрарыстычнай арганізацыі (караецца пазбаўленьнем волі на тэрмін ад 8 да 15 гадоў)
- неаднаразовае парушэньне парадку ўезду-выезду на часова акупаваную тэрыторыю Ўкраіны (ад 3 да 5 гадоў пазбаўленьня волі)
- вядзеньне агрэсіўнай вайны (ад 10 да 15 гадоў зьняволеньня)
Абвінавачаньне перакананае, што грамадзянін Беларусі, усьведамляў «небясьпечны характар сваёй дзейнасьці, якая прывяла да гібелі цывільнага насельніцтва і руйнаваньня сацыяльна-эканамічных аб’ектаў дзяржавы».
ГЛЯДЗІЦЕ ТАКСАМА: Украіна патрабуе роспуску «ДНР» і «ЛНР» і кантролю над мяжойПаводле абвінавачваньня, Дзьмітры Новікаў у лістападзе 2014 году далучыўся да незаконных узброеных фармаваньняў так званай «Данецкай народнай рэспублікі» праз групу ў сацыяльных сетках, якая кіравалася з Масквы.
Непасрэдна ж кантракт «аб паступленьні на аплачаную вайсковую службу» Новікаў падпісаў ужо ў Данецку. У складзе танкавага батальёну «Самалі» удзельнічаў у баях за Данецкі аэрапорт, а потым у збройных сутыкненьнях з украінскімі войскамі ў Ясінавацкім раёне Данецкай вобласьці.
Зь лістапада 2014 году ён пэрыядычна звальняўся са службы ў «ДНР» і большую частку часу знаходзіўся ў Расеі. Паводле сьледзтва, ягоная дзейнасьць і неаднаразовыя вяртаньні ў незаконныя ўзброеныя фармаваньні каардынаваліся зь Сергіевага Пасаду пад Масквой.
ГЛЯДЗІЦЕ ТАКСАМА: «Замарожаныя». Гісторыі дзяцей, якія жывуць на лініі фронтуДзьмітры Новікаў пасьля абвяшчэньня абвінаваўчага акту заявіў, што не прызнае сябе вінаватым ні па адным з трох інкрымінаваных яму артыкулаў Крымінальнага кодэксу Ўкраіны:
«"Самалі" не зьяўляецца незаконным узброеным фармаваньнем ці тэрарыстыянай арганізацыяй. Гэта законнае ўзброенае фармаваньне. У вядзеньні агрэсіўнай вайны я таксама не лічу сябе вінаватым, бо я ня ўдзельнічаў ні ў баявых дзеяньнях, ні ў запалохваньні насельніцтва, ні ў зьдзяйсьненьні тэрарыстычных актаў. Я ні ў каго не страляў, нікога не рабаваў. Я выконваў службу».
ГЛЯДЗІЦЕ ТАКСАМА: 500 за сэпаратыстаў, 300 за Ўкраіну — як беларусы ўдзельнічаюць у канфлікце на ДанбасеУ той жа час ён прызнаў, што некалькі разоў перасякаў мяжу Расеі і Ўкраіны, але ня лічыць гэта парушэньнем парадку наведваньня Ўкраіны. Дзьмітры Новікаў таксама адпрэчыў, што прыехаў на службу ў гэтак званую «ДНР» паводле змовы з прадстаўнікамі Расеі: «Я ні з кім ні пра што не дамаўляўся. Я прыехаў сам, добраахвотна».
Цяпер суд мае дасьледаваць усе доказы віны, сабраныя ў часе дасудовага сьледзтва. Спачатку суд дапытае сьведкаў, потым вывучыць пісьмовыя доказы, і толькі потым дапытае абвінавачанага. Як стала вядома Свабодзе, у якасьці сьведкаў будуць дапытаныя грамадзяне Ўкраіны, якія таксама ваявалі ў незаконным фармаваньні «Самалі», але яны знаходзяцца на волі.
Сёньня суд пастанавіў падоўжыць да 28 сьнежня ўтрыманьне Дзьмітрыя Новікава пад вартай. У той жа час суд вырашыў, што Новікаў можа быць вызвалены ў выпадку, калі ўнясе фінансавы заклад у памеры 576 тысяч грыўняў (амаль 50 тысяч рублёў). Пры гэтым ён мусіць прытрымлівацца пэўных абмежаваньняў – зьяўляцца на судовыя пасяджэньні, не ўплываць на сьведкаў і не выяжджаць за межы вызначанага для знаходжаньня населенага пункту.
Паводле рашэньня суда, на наступнае паседжаньне 10 сьнежня будуць выкліканыя сьведкі абвінавачаньня.
ГЛЯДЗІЦЕ ТАКСАМА: Украіна пачала адводзіць свае войскі на Данбасе — дзеля сустрэчы з Пуціным у нармандзкім фармаце