Затрыманую ў Менску на запыт ЗША грамадзянку Расеі Ганну Багачову вызвалілі. Пра гэта паведаміла расейскае агенцтва «РИА Новости» са спасылкай на пасольства Расеі ў Беларусі.
Паведамлялася, што Багачову затрымалі 13 кастрычніка каля 22 гадзін у адным зь менскіх гатэляў.
Міністэрства ўнутраных спраў Беларусі зрабіла наступную заяву ў сваім афіцыйным Тэлеграм-канале:
«Сёньня, 15 кастрычніка, у адрас МУС Беларусі ад беларускіх і расейскіх журналістаў паступілі запыты з просьбай пацьвердзіць або абвергнуць інфармацыю пра затрыманьне ў Менску грамадзянкі Расейскай Фэдэрацыі Ганны Багачовай. Ганна Багачова была затрыманая ў адной з гасьцініц гораду Менску як асоба, якая знаходзіцца ў міжнародным вышуку. Ва ўстаноўленым парадку матэрыялы былі перададзеныя для вывучэньня і прыняцьця рашэньня ў пракуратуру. У цяперашні час яна адпушчаная».
Багачова — адна з 13 расейцаў, якім выставілі абвінавачаньні пасьля расьсьледаваньня спэцпракурора ЗША Робэрта Мюлера.
Хто такая Ганна Багачова
Як высьветліла расейская служба Радыё Свабода, Ганна Багачова добра вядомая ў колах расейскіх нацыяналістаў як «Анна Тригга». Яна была актывісткай арганізацыі «Русский образ», уваходзіла ў «групу падтрымкі» Ільлі Гарачава на судзе па справе «Баявой арганізацыі рускіх нацыяналістаў» (Борн), па выніках якога Гарачаў атрымаў пажыцьцёвы тэрмін за арганізацыю некалькіх забойстваў.
«Анна Тригга» (справа)
Таксама паведамляецца, што яна была знаёмая з Марыяй Буцінай, якая таксама трапіла ў поле зроку ФБР падчас расьсьледаваньня справы аб умяшаньні Расеі ў амэрыканскія выбары і пасьля пагадненьня са следзтвам была асуджаная ў ЗША да аднаго з паловай гадоў пазбаўленьня волі за дзейнасьць у якасьці незарегістраванага агента замежнага ўраду.
Вядома, што ў 2011 годзе Ганна Багачова выступала на моладзевым форуме ў Беларусі зь лекцыяй «пра інфармацыйную бясьпеку і сацыяльныя сеткі». Яна фігуруе на фота ў Інстаграме былога актывіста арганізацыі «Русский образ» Яўгена Валяева.
На іншым фота, апублікаваным тэлеграм-каналам «Белорусский порядок», разам з Валеевым і Багачовай ёсьць і Сяргей Лушч — цяперашні кіраўнік зарэгістраванага ў Беларусі грамадзкага аб’яднаньня «Русь молодая».
Гэта створаная ў 2005 годзе праўрадавая расейская моладзевая арганізацыя, якая сваёй ідэалёгіяй называе «грамадзянскі нацыяналізм».
Сяргей Лушч адмовіўся адказваць на пытаньні Свабоды пра Багачову, сказаўшы, што знаходзіцца ў камандзіроўцы.