Былы прэзыдэнт Грузіі Георгі Маргвелашвілі возьме ўдзел у форуме «Менскага дыялёгу» 7-8 кастрычніка, паведаміў праграмны каардынатар рады ў міжнародных дачыненьнях «Менскага дыялёгу» Дзяніс Мельянцоў.
Паводле яго, у форуме будзе ўдзельнічаць яшчэ адзін экс-прэзыдэнт, колішні кіраўнік Харватыі Ст'епан Мэсіч. Таксама прыедуць унукі двух міністраў замежных спраў СССР — Вячаслава Молатава і Андрэя Грамыкі, абодва экспэрты ў міжнароднай палітыцы.
Гэтым разам чакаецца звыш паўтысячы экспэртаў ад 28 партнэраў з розных краін сьвету.
«Наш форум адзіны, дзе суседнічаюць прадстаўнікі расейскага фонду Гарчакова і Эўрапейскага фонду ў падтрымку дэмакратыі», — падкрэсьліў кіраўнік рады ў міжнародных дачыненьнях Яўген Прэйгерман.
Паводле арганізатараў, у форуме чакаецца ўдзел Аляксандра Лукашэнкі.
Аляксандар Лукашэнка на леташнім "Менскім дыялёгу"
«Мы ведаем, што такі ўдзел заплянаваны ў рабочым графіку кіраўніка дзяржавы, хоць жыцьцё складанае і магчымае ўсё. Усё ж спадзяёмся, што Аляксандар Лукашэнка зможа далучыцца да нашага мерапрыемства», — адзначыў Дзяніс Мельянцоў.
Карэспандэнт Свабоды пацікавіўся, ці наведае Менск вярхоўная прадстаўніца Эўразьвязу ў пытаньнях вонкавай палітыкі і бясьпекі Фрэдэрыка Магерыні. Паводле Яўгена Прэйгермана, яе працоўны графік складзены так, што непасрэдна ў форуме эўрачыноўніца ўдзельнічаць ня будзе, аднак яна наведае Менск у канцы гэтага тыдня — гэта будзе падзея ў рамках «Усходняга партнэрства».
Такім чынам, у Беларусь зьедуцца міністры замежных спраў шасьці дзяржаў, якія ўваходзяць у праграму «Ўсходняга партнэрства», а таксама кіраўнікі МЗС краін Эўразьвязу, якіх зацікавіць прапанаваная тэматыка.
ГЛЯДЗІЦЕ ТАКСАМА: Цуду, што ўлады пачнуць саступаць Захаду па ўсіх пазыцыях, ня будзе, — Прэйгерман