Пра намер абмежаваць выкарыстаньне тэлефонаў у беларускіх школах было вядома і раней. Пасьля выпадку ў Гомлі гэта пачалі рабіць масава.
Пра тое, што выкарыстаньне мабільных тэлефонаў у беларускіх школах могуць абмежаваць, паведамлялася яшчэ ў сакавіку 2019 году.
Загад міністра адукацыі, які забараняе вучням выкарыстоўваць мабільныя тэлефоны ў школе
Пра гэта расказаў кіраўнік галоўнага ўпраўленьня выхаваўчай працы і моладзевай палітыкі Мінадукацыі Эдуард Тамільчык. Чыноўнік спасылаўся на загад ад 11 сакавіка 2019 году №156 «Аб зацьвярджэньні прыкладнай інструкцыі аб арганізацыі прапускнога рэжыму ва ўстановах агульнай сярэдняй адукацыі».
ГЛЯДЗІЦЕ ТАКСАМА: Хто баіцца «мабілаў» у школах«Гэтым загадам, акрамя іншага, даручана галоўным упраўленьням адукацыі аблвыканкамаў, камітэту адукацыі Мінгарвыканкаму ўнесьці ў правілы ўнутранага распарадку для навучэнцаў пункт аб абмежаваньні выкарыстаньня імі мабільнай сувязі падчас адукацыйнага працэсу, — цытавала Тамільчыка агенцтва БелТА. — Прапануецца абсталяваць навучальныя кабінэты прыстасаваньнямі з вочкамі для часовага захоўваньня сродкаў мабільнай сувязі падчас уроку».
Пасьля выпадку ў школе №15 Гомеля чыноўнікі перайшлі да больш рашучых дзеяньняў. Першыя паведамленьні аб патэнцыйнай забароне выкарыстаньня мабільнікаў школьнікамі пачалі прыходзіць неўзабаве пасьля навіны аб аднаўленьні «настаўніцы з партай» на яе ранейшым працоўным месцы.
Раніцай 20 верасьня паведамленьні пра абмежаваньне выкарыстаньня мабільных тэлефонаў у школах клясныя кіраўнікі пачалі масава рассылаць бацькам вучняў. Публікуем адно зь іх, атрыманае ад кляснай кіраўніцы адной зь менскіх школаў.
ГЛЯДЗІЦЕ ТАКСАМА: Як Лукашэнка знаёміўся з IT: ад «сьметніцы» і «мацерных словаў» да «пляфонаў» і «лічбавізацыі»Што важна ведаць пра канфлікт вакол «настаўніцы з партай»
З чаго ўсё пачалося
Гомельскае выданьне «Сильные новости» апублікавала 13 верасьня відэа, зьнятае вучнямі мясцовай школы №15: настаўніца замахваецца партай на вучня і абражае яго. У прыватнасьці, настаўніца кажа: «Я ў турму пайду, а табе *** [гамон] будзе».
Настаўніца на відэа — Людміла Чацьвярткова. Яна працавала ў школе 35 гадоў і неўзабаве мела выйсьці на пэнсію. Звычайна яна выкладала ў 2 клясе, у 4 кляс у дзень інцыдэнту трапіла на замену. Сьцьвярджаецца, што яна пасьля здарэньня напісала тлумачальную і прызнавала свае дзеяньні няправільнымі.
Настаўніцу спачатку звольнілі
Вечарам 13 верасьня ў школе прайшоў бацькоўскі сход, на якім былі намесьнік старшыні гарвыканкаму Віталь Атаманчук, начальнік упраўленьня адукацыі Сяргей Парошын і іншыя чыноўнікі.
Настаўніца Людміла Чацьвярткова
На сходзе Парошын патлумачыў бацькам сытуацыю, папрасіў прабачэньня і абвясьціў, што настаўніца звольненая.
Як адрэагавалі бацькі
Бацька 9-гадовага школьніка, на якога кідалася з партай настаўніца, казаў, што абураны рэакцыяй дарослых, якія вінавацяць яго сына ў інцыдэнце. Ён падкрэсьліў, што ягоны сын ня ставіў настаўніцы падножку: гэта вэрсія карыстальнікаў інтэрнэту.
Адзін з бацькоў вучняў школы №15 расказваў, што Чацьвярткова нібыта парвала вуха ягонаму сыну, калі той вучыўся ў першым клясе, і што рэгулярна прыніжала дзяцей і чыніла гвалт адносна іх.
19 верасьня каля 30 бацькоў выйшлі на стыхійны сход да школы, але на перамовах з чыноўнікамі не дамагліся аднаўленьня яе на працы. Бацькі вырашылі зьбіраць подпісы пад пэтыцыяй за вяртаньне дырэктаркі.
Лукашэнка загадаў вярнуць настаўніцу
18 верасьня стала вядома, што Аляксандар Лукашэнка даручыў аднавіць на працы настаўніцу Чацьвярткову і звольніць дырэктарку школы. Міністра адукацыі Ігара Карпенку папярэдзілі аб няпоўнай службовай адпаведнасьці, «строга папярэдзілі» прэм’ер-міністра, кіраўніцу Адміністрацыі прэзыдэнта і віцэ-прэм’ера, адказнага за адукацыю.
19 верасьня Лукашэнка публічна выказаўся ў падтрымку настаўніцы: маўляў, на яе месцы «галаву б адкруціў шчанюку». Таксама ён заявіў, што са зьдзекаў з настаўнікаў пачынаюцца трагедыі, як у Стоўпцах. Чыноўнікаў ён раскрытыкаваў за тое, што яны «абсікаліся, што іх, бачыце, у сацыяльных сетках разьмясьцілі».
Міліцыя распачала праверку
У сувязі з інцыдэнтам міліцыянты распачалі праверку ў межах адміністрацыйнага заканадаўства, апытвалі ўсіх удзельнікаў канфлікту, у тым ліку сьведак-дзяцей пры ўдзеле бацькоў, а таксама хлопца, на якога настаўніца замахвалася партай, і ягонага бацьку.