Паўло Грыб — студэнт Кіева-Магілянскай акадэміі, грамадзкі актывіст, які ва ўзросьце 19 гадоў быў выкрадзены расейскімі спэцслужбамі з тэрыторыі Беларусі. Ён стаў адным з тых, зто трапіў пад абмен зьняволенымі паміх Расеяй і Ўкраінай 7 верасьня. У гутарцы з карэспандэнткай украінскай службы Радыё Свабода ён падзякаваў людзям з розных краінаў, якія дабіваліся яго вызваленьня.
У Расеі яго абвінавацілі ў «садзейнічаньні тэрарыстычнай дзейнасьці» і прысудзілі 6 гадоў калёніі. Ён быў самым маладым сярод украінскіх палітвязьняў, якіх незаконна ўтрымліваў Крэмль. Паўло Грыб мае цяжкае захворваньне, якое патрабуе пастаяннага прыёму лекаў.
Паўло Грыб у расейскім судзе. 22 сакавіка 2019
З жыцьцяпісу
Нарадзіўся 1 чэрвеня 1998 у сям’і афіцэра-памежніка і санітаркі, удзельніцы ліквідацыі аварыі на Чарнобыльскай АЭС. Менавіта з Чарнобылем зьвязваюць захворваньне, якое мае Паўло Грыб — партальную гіпэртэнзію. Да выкраданьня — жыў з бацькамі ў Кіеве, у апошнія месяцы — рыхтаваўся да апэрацыі, якая павінна палепшыць яго стан. Мае сястру — Вольгу. Яго бацька, Ігар Грыб, на час выкраданьня сына — вэтэран украінскай вайсковай апэрацыі ў Данбасе, вайсковы капэлян і дарадца старшыні Сінадальнай управы вайсковага духавенства ПЦУ.
Празь некалькі месяцаў пасьля таго, як яго сына незаконна зьмясцілі ў расейскі СІЗА, Ігара Грыба прызначылі начальнікам аддзелу Міністэрства часова акупаваных тэрыторыяў па пытаньнях асобаў, пазбаўленых асабістай свабоды.
Пасьля анэксіі Крыму і пачатку расейскай ўзброенай агрэсіі на Данбасе Паўло дэманстраваў ў сацсетках праўкраінскія погляды, удзельнічаў у трэнінгах па тактычнай мэдыцыне і ў валянтэрскім руху.
Хроніка зьняволеньня
24 жніўня 2017 Паўло Грыб зьнік. Пазьней яго бацька паведаміў, што сын паехаў у Беларусь, каб сустрэцца зь дзяўчынай з Расеі, зь якой ён да гэтага меў зносіны толькі ў сацсетках і якая, нібыта, там дэманстравала праўкраінскія погляды.
Пазьней Паўло Грыб расказаў сваім адвакатам, што 24 жніўня яго выкралі невядомыя — на аўтавакзале ў беларускім Гомелі, пасьля сустрэчы з гэтай дзяўчынай. Яго вывезьлі ў Расею і перадалі ў рукі іншым невядомым яму асобам.
Аднак паводле вэрсіі прадстаўнікоў расійскага ФСБ, Паўла Грыба затрымалі на некалькі дзён пазьней, у Смаленскай вобласьці. Пасьля гэтага расейскія спэцслужбы перавезьлі выкрадзенага ўкраінца ў Краснадар.
Пра тое, што Паўло Грыб выкрадзены Расеяй і ўтрымліваецца ва ўправе ФСБ ў Краснадары, 7 верасьня 2017 году афіцыйна паведаміў дырэктар дэпартамэнту консульскай службы МЗС Украіны Васіль Кірыліч.
У верасьні 2017 году да Грыба дапусьцілі адваката Андрэя Сабініна. Ён, у прыватнасьці, канстатаваў, што яго падабаронны ня мае доступу да неабходных яму лекаў. Патрабаваньні ўкраінскага МЗС аб прадастаўленьні Паўлу Грыбу неадкладнай мэдычнай дапамогі і аб яго вяртаньні ва Ўкраіну засталіся безвыніковымі.
Расейская пракуратура выставіла Паўлу Грыбу абвінавачаньні ў «арганізацыі тэрарызму»: паводле вэрсіі абвінавачаньня, ён прапаноўваў сваёй расейскай знаёмай зладзіць выбух у школе № 26 у горадзе Сочы «з дапамогай самаробнага выбуховага прыстасаваньня».
Тым часам да партальнай гіпэртэнзіі, на якую хварэе Паўло Грыб, дадаліся і іншыя хваробы. У сьнежні 2018-га адвакатка палітвязьня Марына Дубровіна расказала, што Паўло Грыб практычна цалкам асьлеп і мае цыроз печані, у яго пагоршылася функцыя згортваньня крыві. Так, «хуткую дапамогу» давялося выклікаць у залю суду. Лекар агледзеў Паўла, але ня змог яго абсьледаваць ў шпіталі, расказала адвакатка.
Паводле Дубровіна, Паўло «здольны прачытаць дакумэнты ..., нават твары людзей яму цяжка разглядзець». Таксама, сьцвярджаюць адвакаты, Паўлу цяжка ўдзельнічаць у пасяджэньнях суду, ён дрэнна бачыць сьведкаў, у яго пагоршылася памяць, і ён «дрэнна запамінае словы адвакатаў».
22 сакавіка 2019 году Паўночнакаўкаскі акруговы вайсковы суд у расейскім Растове-на-Доне вынес прысуд Паўлу Грыбу. Яго прызналі вінаватым у «падбухторваньні да тэракту» ў Сочы і засудзілі на 6 гадоў калёніі.
У той самы дзень Паўло Грыб на знак пратэсту супраць прысуду абвясьціў галадоўку. Але праз чатыры дні спыніў яе, паведаміў выканаўца абавязкаў генэральнага консула Ўкраіны ў Растове-на-Доне Тарас Малышэўскі. Паводле дыплямата, ён сустрэўся з украінскім зьняволеным Крамля і пераконваў яго выйсьці з галадоўкі, бо «гэта для яго будзе нічым іншым, як самагубствам».
23 ліпеня Вярхоўны суд Расеі разгледзеў апэляцыю Паўла Грыба і пакінуў прысуд у сіле.
На гэта Эўрапейскі зьвяз зрабіў афіцыйную заяву з асуджэньнем гэтага рашэньня.
«Вярхоўны суд Расейскай Фэдэрацыі падтрымаў ... заключэньне на шэсьць гадоў Паўла Грыба, 21-гадовага грамадзяніна Ўкраіны — інваліда, які быў выкрадзены зь Беларусі расейскімі ўладамі... З тых часоў ён незаконна знаходзіўся ў Расеі безь якіх-небудзь абгрунтаваных абвінавачаньняў. Эўрапейскі зьвяз працягвае чакаць, што Паўло Грыб будзе неадкладна звольнены», — гаворыцца ў заяве.
Таксама ў ёй ўспамінаюць, што юнак пакутуе ад сур’ёзных захворваньняў, якія пагражаюць яго жыцьцю, а таму ён павінен неадкладна атрымаць належнае спэцыялізаванае лячэньне.
МЗС Украіны паўтарыла свае патрабаваньні вызваліць Паўла Грыба і назвала судовае рашэньне ў яго справе «сьведчаньнем адсутнасьці правасудзьдзя ў Расеі».
Мітынг у падтрымку Паўла Грыба, Кіеў, 24 студзеня 2019
Украінскія дыпляматы заклікалі міжнародную супольнасьць асудзіць неправамернае рашэньне расейскага суду ў справе Грыба і патрабаваць безумоўнага вызваленьня ўсіх грамадзянаў Украіны, «якія крамлёўскі рэжым трымае ў закладніках на тэрыторыі Расеі і ў акупаваным ўкраінскім Крыме».
У жніўні Паўла Грыба перавезьлі ў маскоўскі СІЗА «Лефортово».