За першае паўгодзьдзе 2019-га году ў адміністрацыю Лукашэнкі паступіла больш за 13 тысяч зваротаў грамадзян, паведамляе БелаПАН.
Вялікая колькасьць скаргаў ўзнікае па пытаньнях, якія датычацца не індывідуальных праблемаў, а ўсяго грамадзтва ў цэлым.
Каля сотні зваротаў кожны працоўны дзень. На што скардзяцца
За студзень-чэрвень 2019 году прэзыдэнцкая адміністрацыя зафіксавала 13 058 зваротаў ад грамадзян — каля сотні на працоўны дзень. Пры гэтым ў аглядзе, падрыхтаваным галоўным упраўленьнем па працы са зваротамі грамадзян і юрыдычных асобаў, паміж зваротамі і скаргамі фактычна ставіцца знак роўнасьці.
Найбольшы рост скаргаў — зь Менскай і Берасьцейскай абласьцей.
Часьцей за ўсё зьвяртаюцца па пытаньнях капітальнага і бягучага рамонту жылых дамоў, добраўпарадкаваньня месцаў агульнага карыстаньня і населеных пунктаў, аплаты камуналкі, стану дарог у раённых і сельскіх населеных пунктах.
У першым паўгодзьдзі 2019 году адміністрацыя Лукашэнкі атрымала на 16% больш скаргаў на сыстэму аховы здароўя (у параўнаньні з аналягічным пэрыядам мінулага году). Сярод прычынаў у аглядзе названыя праблемы забесьпячэньня ільготнікаў мэдыцынскімі прэпаратамі. «На іх думку, беларускія аналягі ў разы горшыя за імпартныя», — гаворыцца ў аглядзе.
ГЛЯДЗІЦЕ ТАКСАМА: Ці беларускія лекі горшыя за імпартныя? Тлумачыць дырэктар фармацэўтычнай кампанііПытаньні занятасьці, архітэктуры і будаўніцтва таксама ўздымаюць часьцей. «Актуальная тэма працаўладкаваньня, асабліва для асобаў перадпэнсійнага ўзросту. У рэгіёнах існуе праблема рэарганізацыі і закрыцьця малых прадпрыемстваў», — адзначаецца ў аглядзе.
Сярод папулярных тэм — скаргі на сьледчыя органы і рашэньні судоў
На 78% вырасла колькасьць скаргаў на «органы сьледзтва» ў параўнаньні з аналягічным пэрыядам мінулага году. «У іх гаворыцца пра незаконныя мэтады сьледзтва, прыняцьці неправамерных рашэньняў», — адзначаецца ў аглядзе.
Апроч таго, сярод папулярных тэм для зваротаў — пытаньні, якія тычыліся рашэньняў судоў і дзеяньняў органаў унутраных спраў, што ў аглядзе «ў значнай меры» зьвязваюць са зваротамі маці асуджаных па «наркатычным артыкуле».
ГЛЯДЗІЦЕ ТАКСАМА: «У турме выдалі бушлат з надпісам «пажыцьцёвае зьняволеньне». Гісторыі падлеткаў, якіх асудзілі «за наркотыкі»Дэпутат Палаты прадстаўнікоў Ганна Канапацкая паведаміла БелаПАН, што ёй таксама даводзіцца ўвесь час атрымліваць звароты грамадзян па пытаньнях сьледзтва, работы судоў і органаў унутраных спраў.
Ганна Канапацкая
«Людзі скардзяцца на тое, што падазраваных зьбіваюць, аказваюць на іх псіхалягічны ціск. Даходзіць да таго, што сваякі пацярпелых дасылаюць кампакт-дыскі з пацьверджаньнем такіх выпадкаў. Гэта сьледзтва ў тым ліку і таго, што ў нашай краіне адсутнічае грамадзкі кантроль за дзейнасьцю сілавых структур», — тлумачыць дэпутат Палаты прадстаўнікоў Ганна Канапацкая.