Пра запрашэньне Аляксандра Лукашэнкі на ўрачыстасьць з нагоды 80-годзьдзя пачатку ІІ сусьветнай вайны, стала вядома яшчэ вясной. Цяпер гэта пацьвердзіла і прэс-служба кіраўніка Беларусі.
Лукашэнку ў Польшчы запрасіў польскі прэзыдэнт Анджэй Дуда. Вялікая міжнародная сустрэча мае адбыцца 1 верасьня ў Варшаве. Свой удзел у ёй ужо пацьвердзіў Дональд Трамп.
Сёньня прэс-сакратарка Аляксанра Лукашэнкі Натальля Эйсмант пацьвердзіла факт такога запрашэньня, перадае агенцтва РИА Новости. Яна адзначыла, што пытаньне візыту Лукашэнкі ў Польшчу знаходзіцца ў стадыі разгляду.
У сакавіку ў Канцылярыі прэзыдэнта Дуды Свабодзе заявілі:
— Польшча будзе ўшаноўваць гэтую дату разам з краінамі, зь якімі мы сёньня блізка супрацоўнічаем на карысьць міру ў сьвеце паводле прынцыпаў міжнароднага права. Да іх адносяцца краіны NATO, Эўразьвязу і «Усходняга партнэрства», у тым ліку і Беларусь, як чалец апошняй ініцыятывы.
На ўрачыстасьці ў Варшаву не запрасілі Ўладзімера Пуціна. Як растлумачыў днямі віцэ-прэм'ер польскага ўраду Яцэк Сасін: «Было б недарэчна адзначаць гадавіну ўзброенай агрэсіі супраць Польшчы з удзелам лідэра, які сёньня дзейнічае такім чынам у адносінах да суседа».
У лютым Варшаву наведаў старшыня беларускага Савету Рэспублікі Міхаіл Мясьніковіч. На пытаньне аднаго з журналістаў пра магчымы візыт Аляксандра Лукашэнкі ў Польшчу ён адказаў, што не выключае такой магчымасьці.