Эўрапейцы ўсё больш ахвотна вяртаюцца да адпачынку ў кэмпінгах, а ў сувязі з гэтым растуць і цэны. Але сумы вельмі розьняцца ў залежнасьці ад краіны. Ноч у беларускім кэмпінгу можа каштаваць у пераліку ад 3 да 10 эўра , а ў швайцарскім — амаль 40.
Самыя дарагія і самыя танныя
Самыя дарагія месцы для кэмпінгу — Швайцарыя, Італія і Харватыя. У сярэднім у сэзон два дарослых чалавекі заплацяць за суткі каля 36 эўра за намёт, парковачнае месца, электрычнасьць і мясцовы падатак.
Наадварот, самыя танныя кэмпінгі — ва Ўсходняй і Паўднёва-Усходняй Эўропе. Двое турыстаў заплацяць менш як 16 эўра за ноч, напрыклад, у Румыніі, Альбаніі альбо Малдове.
| Краіна | Сярэдні кошт сутак (у эўра) |
|
Беларусь | 6 |
|
Бэльгія | 21 |
|
Грэцыя | 24.5 |
|
Італія | 36.2 |
|
Літва | 16 |
|
Латвія | 21 |
|
Польшча | 18 |
|
Украіна | 10 |
|
Харватыя | 34.5 |
|
Чэхія | 20 |
Найбольш кэмпінгаў у гісторыі
«Колькасьць людзей, якія праводзяць адпачынак у намётах альбо трэйлерах, павялічваецца з гадами, і папулярнасьць кэмпінгаў расьце. Колькасьць даступных сёньня кэмпінгаў — самая высокая за ўсю гісторыю», — тлумачыць Максыміліян Мёрль, адзін з супрацоўнікаў вэб-сайту camping.info.
Пра павелічэньне колькасьці наведнікаў паведамляюць кэмпінгі ў Нямеччыне, Аўстрыі і Італіі. «Гэта больш ня тыя, хто шукае танны адпачынак, і не клясычныя бадзягі — усё больш тых, хто хоча адпачываць бліжэй да прыроды, ня хоча прачынацца на курортах, але ў той жа час шукае адносны камфорт. Францыя і іншыя краіны, якія хутка зразумелі гэта, актыўна працуюць і адаптуюцца да новых патрабаваньняў сваіх наведнікаў», — тлумачаць прапагандысты кэмпінгавага адпачынку.
ГЛЯДЗІЦЕ ТАКСАМА: «Іншаземцы пытаюцца, а чаму не відаць вашых мужчын?» Асаблівасьці беларускага агратурызму
Камфорт на пяць зорак
Зьяўляюцца чатырох- і пяцізоркавыя кэмпінгі, якія адпавядаюць чаканьням і самых патрабавальных турыстаў. «Людзі аддаюць перавагу пяцізоркаваму кэмпінгу перад трохзоркавым гатэлем», — кажа Клара Велінска з асацыяцыі кэмпінгу і караванінгу ў Чэхіі.
Такія патрабаваньні ўключаюць ня толькі прыбіральні і шлянгі з вадой у цэнтры лягера. У замежжы гарачая вада звычайна даступная без часавых абмежаваньняў, прыбіральні чыстыя, а таксама ёсьць пляцоўкі для дзяцей і нават басэйны.
Чаму аб'яжджаюць Беларусь
У Беларусі інтарэс да кэмпінгаў пакуль ня надта вялікі. У 2014 тагачасны прэм’ер-міністар Міхаіл Мясьніковіч даручыў разабрацца, чаму караванэры аб’яжджаюць Беларусь. Зьявіўся плян разьвіцьця кэмпінгаў, у 2016 прайшоў першы міжнародны зьлёт на Сяляве. Аднак, сытуацыя не палепшылася.
ГЛЯДЗІЦЕ ТАКСАМА: «Вялесаў шлях». Як на Глыбоччыне аграсядзібы для турыстаў аднаўляюць паганскія капішчы і звычаі— Пасьля ўвядзеньня бязьвізавага рэжыму праз аэрапорт Расея закрыла мяжу — цяпер замежнікам трэба ўяжджаць да нашых усходніх суседзяў празь міжнародныя пункты пропуску. Што граху таіць: мы для караванэраў былі прывабнай транзытнай краінай. Цяпер нас аб’яжджаюць бокам. Спадзяемся, што перамовы аб узаемным прызнаньні візаў усё вернуць назад. Разьлічваць толькі на ўнутраны турызм у нашым выпадку не даводзіцца, — сказаў у інтэрвію sb.by старшыня беларускага саюзу кэмпінгаў Уладзімір Рудой. — У нас на ўліку стаіць прыкладна 2,5 тысячы аўтадамоў і прычэпаў. Зь іх актыўна падарожнічае сотні дзьве-тры. Астатнія выкарыстоўваюць караваны як бытоўкі, езьдзяць на рыбалку... Калі на Захадзе гэта папулярна, то нашых людзей трэба прывучаць да такога адпачынку.