Дырэкцыя ІІ Эўрапейскіх гульняў апублікавала пералік рэчаў, якія забаронена праносіць на абʼекты ІІ Эўрапейскіх гульняў.
Нельга праносіць:
- зброю, выбухоўкі, электрашокеры, піратэхнічныя сродкі муляжы і цацкі, падобныя для іх;
- лазэрныя ўказкі і маркеры;
- кастэты і працоўныя інструмэнты;
- алькаголь, наркотыкі, псыхатропы;
- прадукты харчаваньня і напоі, дазволена праносіць безалькагольныя напоі ў празрыстай бутэльцы;
- прадметы і сумкі большыя за 40×40×45 і вагой большай за 5 кг;
- дзіцячыя вазкі;
- любыя рэклямныя матэрыялы;
- жывёлаў акрамя сабак-павадыроў;
- больш за 1 упакоўку лекаў ці больш за 7 найменаваньняў лекаў у любой форме;
- тэрмасы і пляшкі;
- сьцягі і банэры большыя за 2×1,5 м;
- незарэгістраваныя сьцягі і вымпелы;
- дроны;
- любыя радыёэлектронныя і высокачастотныя прылады акрамя мабільных тэлефонаў.
Поўны пералік прадметаў тут. Паводле правілаў, гледачы мусяць здаваць забароненыя для праносу рэчы ў камэру захоўваньня.
Эўрапейскія гульні — 2019. Што важна ведаць
Другія Эўрапейскія гульні прайшлі у Менску з 21 па 30 чэрвеня 2019 году.
- На падрыхтоўку і правядзеньне II Эўрапейскіх гульняў Беларусь выдаткавала ня менш за 840 мільёнаў рублёў (каля 400–430 млн даляраў).
- За два гады да гульняў Аляксандар Лукашэнка заяўляў, што Беларусі трэба будзе затраціць ня болей за 50 млн даляраў плюс дапамогуць эўрапейскія структуры. У кастрычніку 2018 году агучвалі ўдвая большую суму, у чэрвені 2019-га — у пяць з паловай раза большую. Выніковую суму абяцаюць назваць у студзені 2020 году.
- З квітком на гульні можна было бязь візы трапіць у Беларусь празь любы памежны пункт.
- Паводле папярэдніх падлікаў, Беларусь за час Эўрапейскіх гульняў наведалі 37 450 турыстаў, зь іх каля 7 тысяч чалавек былі акрэдытаваныя на гульні. Для параўнаньня, на чэмпіянат сьвету па хакеі ў Менск у 2014 годзе прыехалі 80 тысяч замежных турыстаў.
- Падчас гульняў у Беларусі працавалі супрацоўнікі МУС Расеі.
- Адкрыцьцё гульняў прысьвяцілі гісторыі Беларусі, закрыцьцё — сучаснасьці.