Экспэрты МУС Расеі ня выявілі сьлядоў наркотыкаў, псыхатропных і моцнадзейных рэчываў у кантрольных змывах з рук і зрэзах пазногцяў арыштаванага па абвінавачаньні ў збыце наркотыкаў журналіста «Медузы» Івана Галунова.
Пра гэта ў телеграм-канале паведаміў кіраўнік Міжнароднай праваабарончай групы «Агора» Павел Чыкава. Праваабаронца апублікаваў копію вынікаў экспэртызы.
Раней галоўны нарколяг Міністэрства аховы здароўя Расеі Яўген Бруно заявіў, што сьлядоў наркотыкаў не знайшлі і ў аналізе мачы журналіста, здадзенай адразу пасьля затрыманьня.
Вынікі такога аналізу маюць юрыдычную сілу.
Таксама хімікі правялі аналізы рэчываў, нібыта канфіскаваных з заплечніка журналіста і ў яго ў кватэры. Гэта аказаліся какаін і вытворныя N-мэтылэфэдрона.
Іван Галуноў быў затрыманы днём 6 чэрвеня па абвінавачваньні ў замаху на збыт наркотыкаў у буйным памеры. Ён сьцьвярджае, што наркотыкі яму падкінулі паліцыянты. Крымінальны перасьлед у адносінах да сябе ён зьвязвае з расьсьледаваньнем пахавальнага бізнэсу, якія ён павінен быў апублікаваць неўзабаве. Аднымі зь дзеючых асоб расьсьледаваньня зьяўляюцца высокапастаўленыя супрацоўнікі ФСБ.