Беларуская біятляністка, двухразовая чэмпіёнка сьвету сярод юніёрак Дар’я Блашко, якая ў 2017 годзе атрымала ўкраінскае грамадзянства, упершыню распавяла пра сустрэчу з Аляксандрам Лукашэнкам пасьля свайго рашэньня аб пераезьдзе ва Ўкраіну.
Спартсмэнка паведаміла, што ў часе сустрэчы, якая адбылася ў Менску празь некалькі месяцаў пасьля таго, як яна ўжо атрымала грамадзянства Ўкраіны, Аляксандар Лукашэнка прапанаваў ёй вярнуцца.
«Былі моманты ў размове, калі ён прапаноўваў вярнуцца, але я адказвала выразна: „Не“. Я тады разумела, што гэта ўжо немагчыма», — сказала Дар’я Блашко ў інтэрвію, апублікаваным ва ўкраінскім выданьні «Трыбуна».
Паводле яе, сустрэча трывала больш за гадзіну: «Перад гэтым мы доўга размаўлялі з Валерыем Паўлавічам Вакульчыкам (ён да траўня 2018 году ўзначальваў Фэдэрацыю біятлёну Беларусі — РС), а потым ужо з Аляксандрам Рыгоравічам Лукашэнкам. Калі разумець, які ён заняты чалавек, то гутарка атрымалася вельмі доўгай. Думаю, дакладна гадзіну ці паўтары».
Адказваючы на пытаньне, ці была гэтая сустрэча складанай, біятляністка адзначыла: «Быў пэўны стрэс, таму што чакала сустрэча з чалавекам, які займае самую высокую пасаду ў краіне. Акрамя таго, я зусім ня ведала, пра што будзе гутарка... І менавіта таму было страшна. А так мы вельмі цёпла пагутарылі, і, мяркую, зразумелі адзін аднаго ў нейкі момант і не разьвіталіся на нэгатыўнай ноце. Але да таго часу я ўжо агучыла сваё рашэньне, што не вярнуся назад, і зьмяніць яго не магла».
ГЛЯДЗІЦЕ ТАКСАМА: Лукашэнка папрасіў Пуціна падзяліцца спартоўцаміЯк беларуская мова дапамагае разумець украінскую
Дар’я Блашко зараз жыве на лыжнай базе ў Чарнігаве, за ўвесь час жыцьця ва Ўкраіне ня мела ніякіх складанасьцяў з інтэграцыяй у мясцовае жыцьцё і ўсё больш адчувае сябе ўкраінкай: «Я нават тэсты ва ўнівэрсытэце фізвыхаваньня ў Кіеве, куды летась перавялася, на ўкраінскай мове здаю. Мне ня так складана гэта рабіць, бо ў шмат якіх момантах мне дапамагае беларуская мова. Ёсьць словы, якія я не разумею, але з часам гэта пройдзе. Калі ва ўнівэрсытэце ўсе размаўляюць па-ўкраінску, то ўсё запамінаецца нашмат хутчэй».
Пра палітычныя сымпатыі
Спартсмэнка прызналася, што сёлета ня ўдзельнічала ў выбарах прэзыдэнта Ўкраіны, бо на той час знаходзілася за межамі краіны. Але кажа, што сымпатызуе новаабранаму прэзыдэнту Ўладзіміру Зяленскаму:
«Пабачыўшы пэўныя моманты, зразумела, што краіне патрэбныя нейкія перамены. Усё ж такі вайна, якую мы збольшага ня бачым, на сабе адчулі многія. І вельмі моцна. Складаецца адчуваньне, што гэтая вайна быццам бы падтрымліваецца, і я ня ведаю, наколькі гэта палітычна правільна. Але яна ўсё неяк не спыняецца і не спыняецца».
Уладзімір Зяленскі ёй імпануе сваёй блізкасьцю да народу: «Гэта вельмі важна для прэзыдэнта. Нельга меркаваць аб прэзыдэнце тады, калі ён толькі прыйшоў да ўлады. Усе будуць меркаваць па ягоных справах. І асноўным крытэрыем будзе тое, што ён здолее зрабіць для людзей і краіны ў пляне зьнешняй і ўнутранай палітыкі. Мяркую, як чалавек, які мае добрае пачуцьцё гумару, ён можа паглядзець на падзеі, што адбываюцца, з розных бакоў і адшукаць пэўныя станоўчыя і адмоўныя моманты».
ГЛЯДЗІЦЕ ТАКСАМА: Фэдэрацыя біятлёну забараніла беларусцы выступаць за Ўкраіну без двухгадовай паўзыДар’я Блашко разам са сваім трэнэрам Уладзімерам Махлаевым летам 2017 году абвясьцілі аб пераезьдзе ва Ўкраіну і плянах перайсьці ва ўкраінскую нацыянальную зборную, бо не змаглі дамовіцца з тагачасным штабам зборнай Беларусі пра мадэль і ўмовы падрыхтоўкі. У верасьні 2017-га прэзыдэнт Украіны Пятро Парашэнка падпісаў указ аб наданьні Дар’і Блашко ўкраінскага грамадзянства.
Ад таго моманту, на працягу двух гадоў спартсмэнка ня мела права выступаць пад сьцягам новай краіны свайго грамадзянства.
Сёлета, калі карантын скончыўся, Блашко дэбютавала ва ўкраінскай зборнай на этапе Кубку IBU: заняла 37-е месца ў спрынце ў італьянскім Мартэлі.
У верасьні 2017-га беларуская спартсмэнка стала чэмпіёнкай Украіны па летняму біятлёну ў спрынце.