Мотафэстываль H.O.G. Rally, які традыцыйна праходзіў у Менску, сёлета прайшоў у расейскім Варонежы. Але, як і раней, фэст наведаў Віктар Лукашэнка — старэйшы сын Аляксандра Лукашэнкі і ягоны памочнік у нацыянальнай бясьпецы.
Разам зь Віктарам Лукашэнкам на адкрыцьці мотасэзону ў Варонежы 11 траўня ў першым шэрагу ехалі сын генэральнага пракурора Расеі Арцём Чайка (ён і Віктар Лукашэнка — заснавальнікі мотаклюбу Iron Birds), афіцыйны прадстаўнік генэральнай пракуратуры Расеі. Таксама ў фэстывалі бралі ўдзел кіраўнік ураду і пракурор Варонескай вобласьці. На фэстывалі таксама заўважылі ўладальніка беларускага МТБанку і сеткі шапікаў «Табакерка» Аляксея Алесіна і саўладальніка турыстычнай кампаніі «Топ-Тур», ганаровага консула Беларусі ў Тайляндзе Івана Чуру.
Віктар Лукашэнка (у цэнтры) і сын генэральнага пракурора Расеі Арцём Чайка (справа)
Як адзначаецца на сайце ўраду Варонескай вобласьці, Віктар Лукашэнка назваў удзел у фэстывалі «народнай дыпляматыяй» і падкрэсьліў, што такія справы «нясуць больш плёну, чым палітыка».
Чаму мотафэстываль перанесьлі ў Расею, не паведамлялася. Арганізатары казалі толькі, што вырашылі штогод праводзіць яго ў розных гарадах СНД. Закрыцьцё мотасэзону па-ранейшаму будзе ў Менску — яно заплянаванае на 14 верасьня, дзень гораду.