У сталіцы Вэнэсуэлы Каракасе пачаліся сутыкненні прыхільнікаў лідэра апазыцыі Хуана Гуайдо зь сіламі бяспекі. Паведамляецца, што з абодвух бакоў ёсьць узброеныя людзі.
На кадрах відэатрансьляцыі відаць, што ўжываецца сьлёзацечны газ. Рэпарцёры Reuters сцвярджаюць, што адбываюцца і перастрэлкі.
Кіраўнік парлямэнту і лідэр апазыцыі Хуан Гуайдо, прызнаны ЗША і шэрагам іншых краін легітымным кіраўніком дзяржавы, заявіў аб пачатку «фінальнай фазы» зьвяржэньня рэжыму прэзыдэнта Нікаляса Мадуры.
VIDEO: Reported footage of rebel soldiers on the streets of #Caracas #Venezuela calling on people to join them. - @ronnarisquezpic.twitter.com/V1jUiNTz0j
— Conflict News (@Conflicts) April 30, 2019
Раней у аўторак Гуайдо, як паведамляе Reuters, прыбыў на базу ваенна-паветраных сілаў у Каракасе ў суправаджэньні вайскоўцаў, якія яго падтрымліваюць, пасьля таго, як заклікаў войска далучыцца да пратэстаў супраць Мадуры. Прыхільнікі Гуайдо абвясьцілі пра намер правесьці масавую акцыю пратэсту 1 траўня.
Пакуль незразумела, колькі вайскоўцаў падтрымалі Гуайдо і ці йдзе гутарка пра пераход войска на ягоны бок.
Міністар інфармацыі Вэнэсуэлы Хорхэ Радрыгес заявіў, што «невялікая група», як ён выказаўся, «здраднікаў» у шэрагах узброеных сілаў паспрабавала ўчыніць пераварот у краіне.
Вострая фаза супрацьстаяння адбываецца ў Вэнэсуэле са студзеня, калі Гуайдо абвінаваціў Мадуру ва ўзурпацыі ўлады і прыняў прысягу як часовы прэзыдэнт. Рычагі кіраваньня краінай і сілавымі структурамі застаюцца ў руках Мадуры, якога падтрымліваюць Куба, Расея, Кітай і Турцыя. ЗША, большасьць краін Лацінскай Амэрыкі і ЭЗ падтрымліваюць Гуайдо.