14 красавіка ў цэнтры Берасьця міліцыя затрымала блогера Аляксандра Кабанава і актывістаў Дзьмітрыя Бекалюка ды Аляксандра Абляка, а таксама яшчэ дваіх удзельнікаў пратэсту.
Як перадае БелаПАН, яны былі затрыманыя на плошчы Леніна, дзе сёньня ў чарговы раз сабраліся праціўнікі будаўніцтва акумулятарнага заводу, больш як 200 чалавек. Такія сустрэчы праходзяць тут кожную нядзелю з 25 лютага 2018 году.
Кабанаву і Бекалюку інкрымінуюць парушэньне артыкулу 23.34 КаАП (парушэньне парадку арганізацыі або правядзеньня масавых мерапрыемстваў).
ГЛЯДЗІЦЕ ТАКСАМА: Берасьцейскі аблвыканкам: Акумулятарны завод будзе адкрыты ў траўніПадчас затрыманьня Бекалюка людзі, якія сабраліся на плошчы, скандавалі «Ганьба».
Таксама праваабаронца Раман Кісьляк паведаміў пра затрыманьне актывісткі Тацяны Фесікавай, якую выклікалі сёньня ў Ленінскі РАУС.
Актывіст Аляксандар Абляк падчас акцыі абвесьціў у мэгафон, што гэта мірны сход і выйсьці на яго людзей вымусілі ўлады, які ня чуюць іх думку супраць працы акумулятарнага завода.
Пасля сустрэчы на плошчы праціўнікі будаўніцтва завода рушылі па цэнтральных вуліцах Пушкінскай і Савецкай да ЦУМа на праспэкце Машэрава. Па дарозе яны скандавалі «Не заводу!».
Падчас шэсьця некалькі супрацоўнікаў АМАПу выхапілі Аляксандра Абляка з цэнтру калёны і пасадзілі яго ў сваю машыну. Таксама быў затрыманы Ягор Кандрацюк, які ішоў побач з Абляком і абурыўся дзеяньнямі АМАПу.
12 красавіка былі зьмешчаныя ў ізалятар часовага ўтрыманьня каля дзесяці праціўнікаў будаўніцтва акумулятарнага завод. У Ленінскі РАУС абласнога цэнтра ў якасьці сьведак было выклікана 12 актывістаў. Затрымалі і да суду зьмясцілі ў ІЧУ: Дзьмітрыя Андрасюка, Уладзімера Казлоўскага, Дзяніса Малашанку, Сяргея Сьвірскага, Уладзіслава Абрамовіча, Алега Ярмоленку, Дзям’яна Лепесевіча, Кацярыну Басаргіну, Алега Вялова і праваабаронцу Ўладзімера Вялічкіна.
Пратэсты супраць акумулятарнага заводу ў Берасьці. Што важна ведаць
Месцазнаходжаньне новага акумулятарнага заводу пад Берасьцем
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.