Афіцыйны прадстаўнік Сьледчага камітэту Сяргей Кабаковіч пацьвердзіў Свабодзе, што ператрус у офісе тэлеканалу «Белсат» зьвязаны са справай пра «паклёп». Але ўдакладніў, што там адбываюцца сьледчыя дзеяньні.
ГЛЯДЗІЦЕ ТАКСАМА: У менскім офісе «Белсату» ператрус, забралі тэхніку. ФОТА і ВІДЭАГэтыя дзеяньні, адзначыў Кабаковіч, санкцыянаваў пракурор, і праводзяцца яны ў адпаведнасьці з Крымінальна-працэсуальным кодэксам Рэспублікі Беларусь.
«Сьледчым камітэтам расьсьледуецца крымінальная справа паводле часткі 2 артыкулу 188 („паклёп“) Крымінальнага кодэксу, — дадаў прадстаўнік СК. — Заведзеная яна была пракуратурай гораду Менску за распаўсюд у інтэрнэце на сайце тэлеканалу „Белсат“ выдумкі паклёпніцкага характару. Падчас расьсьледаваньня былі атрыманыя зьвесткі аб месцы знаходжаньня кампутарнай тэхнікі, з дапамогай якой, як мяркуецца, была сьвядома распаўсюджаная непраўдзівая інфармацыя».
ГЛЯДЗІЦЕ ТАКСАМА: Журналіст «Белсату» патлумачыў, з чым зьвязаны ператрусПаводле Кабаковіча, «Белсат» не зьяўляецца сродкам масавай інфармацыі і ў іх няма офіса ў Менску.
«Гэта звычайная кватэра. Акрамя таго, неабходна зрабіць акцэнт на тое, што прадстаўнікі польскага тэлеканалу раней дапытваліся ў межах расьсьледаваньня гэтай крымінальнай справы і для іх не павінна было стаць нечаканасьцю, што магчымае правядзеньне сьледчых дзеяньняў. На гэты момант гэта ўся інфармацыя», — сказаў Свабодзе Сяргей Кабаковіч.