Настаяцель горадзенскага праваслаўнага Сьвята-Пакроўскага сабору айцец Георгі Рой выказаўся пра курапацкія крыжы на сваёй старонцы ў фэйсбуку. Ён мяркуе, што за знос крыжоў чыноўнікі павінны папрасіць прабачэньня.
Сьвятар заўважыў, што празь некалі дзён з моманту зносу крыжоў у Курапатах сьціхлі першыя эмоцыі, але засталіся пытаньні і «пачуцьцё глыбокага непаразуменьня». На ягоную думку, сытуацыю можна было б прыняць як перагіб канкрэтных выканаўцаў «праграмы добраўпарадкаваньня», калі б не далейшыя падзеі.
Айцец Георгі Рой
«На наступны дзень пасьля выдзіраньня крыжоў галоўная дзяржаўная газэта разьмяшчае публікацыю свайго карэспандэнта, які чорным па белым піша пра тое, што адзінае, пра што можна шкадаваць, — дрэва, якое пайшло на крыжы, а не на нешта карыснае. Як гэта разумець нам — хрысьціянам?» — пытаецца айцец Рой.
Ён абураецца, што з курапацкімі крыжамі ня толькі абышліся, як зь нікчэмным сьмецьцем, але на дадатак і дзяржаўная газэта піша пра крыж, галоўны сымбаль хрысьціянства, як пра нешта цалкам непатрэбнае і нявартае.
«Калі сам знос і можна было б кваліфікаваць як перагіб выканаўцаў, то тут, напэўна, усьвядомленая абраза крыжа як такога. І прэс-сакратар прэзыдэнта, і адзін зь вядомых сэнатараў (маецца на ўвазе былы чалец Савету Рэспублікі і цяперашні дэпутат Палаты прадстаўнікоў Ігар Марзалюк. — РС) кажуць толькі аб добраўпарадкаваньні, упарта не заўважаючы зусім недапушчальнага брутальнага і цынічнага стаўленьня да сьвятыні хрысьціянскай веры», — піша сьвятар.
Айцец Георгі Рой робіць выснову, што ніводзін з адказных чыноўнікаў так і не заўважыў у гэтым ніякай праблемы, «ня кажучы ўжо пра тое, што за такія грубыя дзеяньні па-чалавечы трэба было б папрасіць прабачэньня».
ГЛЯДЗІЦЕ ТАКСАМА: «Духоўнік Лукашэнкі» выказаўся наконт зносу крыжоў у Курапатах ГЛЯДЗІЦЕ ТАКСАМА: Ксёндз Барок пра Курапаты: Або вернем тых, хто там ляжыць, або і нас пахаваюць там ГЛЯДЗІЦЕ ТАКСАМА: «Д’яблы вельмі баяцца знаку Сьвятога Крыжа», — прэсавы сакратар БПЦ Сяргей ЛепінШто адбылося ў Курапатах?
У Курапатах зранку 4 красавіка зьнесьлі 70 крыжоў і пачалі ўсталёўваць плот. Улады сьцьвярджаюць, што крыжы паставілі незаконна.
Паралельна са зносам крыжоў у Курапатах затрымалі 15 чалавек. Увечары частку іх выпусьцілі з адміністрацыйнымі пратаколамі і будуць судзіць.
Ці законна гэта? Суд па крыжах у Курапатах меў адбыцца пасьля 19 красавіка. Па стане на 21:00 4 красавіка не былі ні апублікаваныя, ні хоць бы названыя дакумэнты, якія тычацца ўпарадкаваньня Курапатаў. Прэс-сакратарка кіраўніка Беларусі Натальля Эйсмант патлумачыла працы ў Курапатах распараджэньнем Аляксандра Лукашэнкі.
Як адрэагавалі людзі? Увечары 4 красавіка памаліцца ў Курапаты прыйшлі больш за 200 чалавек. Яны прайшлі крыжовым шляхам да месца, дзе раніцай зносілі крыжы. 7 красавіка некалькі соцень чалавек маліліся за Курапаты ў цэнтры Менску.
Рэакцыю палітыкаў, грамадзкіх актывістаў і публічных асоб можна пачытаць тут.