У Слонімскі раённы выканаўчы камітэт і раённы Савет паступілі звароты грамадзянаў аб перайменаваньні плошчы Леніна.
У лісьце гараджане прапануюць новую назву — Тэатральная плошча. На сайце газэты «Слонімскі весьнік» ідзе адкрытае галасаваньне, у якім кожны ахвотны можа выказаць сваё меркаваньне.
На гэты час прагаласавала амаль 3 тысячы чалавек. Звыш 1800 галасоў за тое, каб перайменаваць плошчу Леніна ў Тэатральную. Крыху больш за 1000 лічаць мэтазгодным пакінуць бязь зьмены.
У сярэдзіне XVIII стагодзьдзя ў Слоніме працавала прыдворная тэатральная трупа гетмана вялікага літоўскага Міхала Казіміра Агінскага.
Паводле «Інвэнтару інструмэнтаў і музычных папераў», складзенага ў 1801 годзе, на розных сцэнах тэатра Агінскага выконваліся 60 опэр, 18 балетаў, 3 музычныя камэдыі, 253 сымфоніі і амаль паўтысячы іншых музычных твораў.