Прэміяй сайту «Хартыя’97» за абарону правоў чалавека імя Віктара Івашкевіча за 2018 год адзначаныя блогеры Сяргей Пятрухін зь Берасьця, Аляксандар Кабанаў зь Бярозы, грамадзкі актывіст Леанід Кулакоў зь Менску і маці загінулага салдата Сьвятлана Коржыч зь Пінску.
Да 2010 года ўручэньне прэміі «Хартыі’97» адбывалася ў Менску, потым было перанесена ў Варшаву. Сёлета ўганараваньне ляўрэатаў вярнулася ў Менск, — адзначыў падчас уручэньня прэміі адзін зь яе ранейшых ляўрэатаў Яўген Афнагель.
Сярод ляўрэатаў два блогеры
Відэаблогеры Сяргей Пятрухін і Аляксандар Кабанаў адзначаныя ў намінацыі «За сьмеласьць у творчасьці і асабістую мужнасьць». Яны другі год змагаюцца супраць будаўніцтва акумулятарнага заводу ў Берасьці.
«Можна толькі захапляцца іхнаю мужнасьцю і радавацца таму, што мы пад абаронай такіх моцных мужчын», — адзначыла, уручаючы дыплёмы, рэжысэр дакумэнтальнага кіно, актывістка Вольга Мікалайчык.
Аляксандар Кабанаў, Вольга Мікалайчык і Сяргей Пятрухін
Відэаблогер Аляксандар Кабанаў згадаў, што дзякуючы сайту «Хартыя’97» у яго адкрыліся вочы на падзеі ў Беларусі:
«Але яшчэ нядаўна я ня мог прадбачыць, што сам буду ўдзельнічаць ў падобных падзеях, у змаганьні, якое асьвятляе сайт „Хартыя’97“. Наш зь Сяргеем унёсак у грамадзкае жыцьцё дзяржава ацаніла пасадкамі, штрафамі і крымінальнымі справамі. Своесаблівая ацэнка, але рады, што цяпер па-сапраўднаму гэта ацаніла і дэмакратычная супольнасьць», — сказаў Аляксандар Кабанаў.
Сяргей Пятрухін пасьля ўручэньня дыплёму сказаў, што будзе і надалей змагацца, каб ягоны сын жыў у вольнай краіне.
Сьвятлана Коржыч прыехаць не змагла
У намінацыі «За асабістую мужнасьць» прэміяй сайту «Хартыя’97» уганараваная Сьвятлана Коржыч, маці салдата Аляксандра Коржыча, які загінуў у 2017 годзе ў Печах.
«Яна працягвае і зараз змагацца, каб стала вядомая праўда пра гэтае злачынства і праўда пра іншых салдат», — адзначылі на цырымоніі.
Сьвятлана Коржыч не змагла прыехаць зь Пінску на ўручэньне прэміі, яе не адпусьцілі з працы. Дыплём ляўрэата ёй перадасьць знаёмая сям’і Ганна Бадзяка, якой дыплём уручыла журналістка Ірына Халіп.
«Кажуць, што самае страшнае для маці — перажыць сьмерць свайго дзіцяці. Гэта пэўна так, але, мяркую, ня менш страшна, калі маці павінна ўступаць у вайну зь дзяржаваю, каб вінаватыя не сышлі ад адказнасьці. Мужнасьць Сьвятланы Коржыч ня мае межаў, менавіта дзякуючы ёй многія легкадумныя беларусы зразумелі, што войска — гэта такое месца, адкуль трэба ратаваць дзяцей, што вайскоўцы — гэта, можа быць, нават больш неабароненая частка грамадзтва, чым грамадзкія актывісты, якіх перасьледуюць, штрафуюць і садзяць на „суткі“. Толькі мы самі можам абараніць нашых дязцей, якіх забіваюць без вайны. Ня будзе беларуская армія цывілізаванай, пакуль у яе рэфармаваньні ня возьмуць удзел салдацкія маці, такія, як Сьвятлана Коржыч», — сказала Ірына Халіп.
Ірына Халіп
Уганараваны абаронца Курапатаў
Актывіст Леанід Кулакоў атрымаў прэмію сайту «Хартыя’97» у намінацыі «За асабістую мужнасьць».
Яўген Афнагель, які вёў цырымонію, адзначыў, што Леанід Кулакоў ня толькі сталы ўдзельнік курапацкай вахты, але ён даўно і мужна змагаецца за абарону правоў чалавека і дэмакратыю ў Беларусі, шмат разоў адбываў арышты, пацярпеў падчас курапацкай вахты ад наезду аўтамабіля.
«Калі такіх Кулаковых будзе больш, дык перамога будзе за намі», — адзначыў экс-старшыня незалежнага прафсаюзу РЭП, якога таксама перасьледавалі ўлады, Генадзь Фядыніч, калі ўручаў Леаніду Кулакову дыплём ляўрэата прэміі.
Кулакоў у адказ заклікаў суграмадзян «пачынаць зь сябе, найперш навучыцца бараніць свае правы».
Леанід Кулакоў
Яўген Афнагель адзначыў, што ўручэньне прэміяў «Хартыі’97» адбылося напярэдадні сьвяткаваньня 101-й гадавіны абвяшчэньня незалежнасьці БНР:
«Гэта вельмі сымбалічна. Нашчадкі будуць згадваць цяперашніх ляўрэатаў, як мы згадваем змагароў, дзякуючы якім была заснаваная Беларуская Народная Рэспубліка».
ГЛЯДЗІЦЕ ТАКСАМА: Абаронцу Курапатаў зноў зьбіў аўтамабіль. ДАІ склала пратакол на актывіста