11-гадовы Лёша Тулай жыве ў новым катэджавым мікрараёне Горадні — у Ласосьне. Каб дабрацца ў школу, Лёша штодня ідзе 2 кілямэтры да аўтобуснага прыпынку, прычым палова дарогі — празь лес па неасьветленай грунтавой дарозе бяз ходнікаў і ўзбочын. Дарога пятляе, час ад часу па ёй праяжджаюць машыны і БМП з вайсковай часткі.
Узімку на дарозе галалёдзіца, улетку ад машын стаіць пыл, у дажджы яе размывае, робяцца вялікія лужыны.
«У мяне ня раз сын вяртаўся са школы брудны, таму што падаў у яму па дарозе, — расказвае Лёшава мама Тацяна Тулай. — Я, вядома, разумею, што ў свой час Ламаносаў па бездарожжы ў Маскву прыйшоў па веды. Але я б не хацела, каб маё дзіця штодня так у школу хадзіла. З гэтым трэба нешта рабіць».
Дзеля бясьпекі Лёша асьвятляе шлях ліхтарыкам і накладае флікер.
«Маленькая Аўстрыя» у Горадні
Гэты кавалак гораду называюць «Маленькай Аўстрыяй», а віцэ-прэм’ер Анатоль Калінін прыводзіў яго як узор іншым абласьцям.
Мікрараён Ласосна-4
У мікрараёне жыве каля 100 сем’яў, у многіх па некалькі дзяцей. Ня ўсіх зь іх бацькі могуць вазіць на заняткі на машыне. Жыхарам абяцалі, што дарогу пабудуюць цягам году пасьля таго, як дамы здадуць у эксплюатацыю. Але і празь некалькі гадоў дарогі няма.
Жыхары Ласосны ня раз зьвярталіся да ўладаў з просьбай пракласьці каля 1 кілямэтру дарогі да асфальту, дзе прыпынак гарадзкога транспарту. Год перапісак зь дзяржаўнымі органамі ня даў вынікаў.
Улады: аб’ект ўключаны ў плян на 2019 год
Вядучы інжынэр дзяржаўнага абласнога ўнітарнага прадпрыемства «Ўпраўленьне капітальнага будаўніцтва Горадзенскага аблвыканкаму» Натальля Лебедзева не здолела адказаць на пытаньне Свабоды, калі пабудуюць асфальтавую дарогу ў гэтым мікрараёне.
«Канкрэтна я вам паведаміць не магу, але ў рамках сваёй кампэтэнцыі скажу, што аб’ект ўключаны ў пералік для добраўпарадкаваньня на 2019 год», — сказала яна.