Міністар абароны Беларусі Андрэй Раўкоў лічыць важным умацаваньне саюзу з Расеяй ва ўмовах выхаду ЗША з дамовы аб ліквідацыі ракет сярэдняй і меншай далёкасьці (РСМД), піша Interfax.by.
Пра што гаворка?
Дамова аб ліквідацыі ракет сярэдняй і меншай далёкасьці была падпісаная кіраўнікамі ЗША і СССР у 1987 годзе. Паводле яе бакі абавязваліся зьнішчыць усе комплексы балістычных і крылатых ракет наземнага базаваньня, а таксама не вырабляць і не праводзіць выпрабаваньняў такіх ракет у будучыні.
Што сказаў Раўкоў?
- «Будзе складана. Будзем умацоўваць Узброеныя сілы, умацоўваць абароназдольнасьць. Умацоўваць саюз Беларусі і Расеі — усё гэта трэба рабіць».
- Новых пагроз для нацыянальнай бясьпекі Беларусі не зьявілася.
Міністэрства замежных спраў Беларусі 4 лютага выказала занепакоенасьць выхадам ЗША з дамовы аб ліквідацыі РСМД, заклікала ЗША і Расею да адказнасьці і нагадала пра СССР.
Што важна ведаць пра дамову аб ліквідацыі РСМД
ЗША 2 лютага пачалі выходзіць з Дамовы аб ліквідацыі РСМД. У адказ на гэта Ўладзімір Пуцін 2 лютага заявіў, што Расея прыпыняе ўдзел у дамове.
- Вашынгтон сьцьвярджае, што Масква парушыла дамову аб РСМД, стварыўшы і разгарнуўшы ракетную сыстэму 9М729. Цяпер Расея валодае 100 такімі ракетамі.
- Масква абвяргае ўсе абвінавачаньні, заяўляючы, што далёкасьць палёту ракеты 9М729 складае 480 кілямэтраў, што на 20 кілямэтраў менш за ніжнюю мяжу, вызначаную дамовай.