Юлія Нічыпарук, якую берасьцейскі суд аштрафаваў за несанкцыянаваны пікет, заявіла Свабодзе, што будаўніцтва акумулятарнага заводу перавярнула жыцьцё яе сям’і. Цяпер нават яе дзеці ведаюць пра небясьпеку заводу.
Юлія Нічыпарук пасьля суду сказала, што абсалютна не чакала, каб зьлепленыя разам зь дзецьмі сьнегавікі давялі яе да суду.
Яна спадзявалася на апраўданьне, аднак суд прызнаў яе вінаватай у правядзеньні несанкцыянаванай масавай акцыі і аштрафаваў на 1 базавую велічыню (25,5 рубля).
Юлія кажа, што яе сям’я 8 год будавала свой дом у вёсцы Шчэбрын пад Берасьцем. Яны адмыслова абралі гэтае месца, зацішнае, без гарадзкога тлуму. Нічыпарукі гадуюць шасьцігадовага сына і двухгадовую дачку і хочуць, каб дзеці «расьлі ў экалягічным асяродзьдзі». Аднак год таму яны даведаліся, што за два кілямэтры ад іх дому будуецца акумулятарны завод.
Тыя самыя «крамольныя» сьнегавікі
«Вінаватай сябе не лічу»
«Штраф невялікі, сума пад’ёмная, але справа ў тым, што я зусім не лічу сябе вінаватай, — сказала Свабодзе Юлія Нічыпарук. — Калі б мы мелі намер пікетаваць, мы б арганізавалі гэта прыгажэй, падрыхтаваліся — зрабілі б транспаранты і гэтак далей. А гэта так проста склалася, што ў машыне аказалася ўлётка, якой мы ўпрыгожылі сьнегавіка».
Гэты штраф ня спыніць яе ўдзелу ў пратэстах супраць акумулятарнага заводу, кажа Юлія.
«Мы ня будзем баяцца рабіць сьнегавікоў (сьмяецца). Будзем працягваць і сьнегавікоў рабіць, і галубоў карміць».
Юлія мае на ўвазе штонядзельныя маўклівыя кармленьні галубоў на цэнтральнай плошчы Берасьця на знак пратэсту супраць будаўніцтва заводу.
Пра сябе Юлія Нічыпарук кажа:
«Я працавала ў швейнай фірме. А цяпер у дэкрэтным адпачынку, даглядаю дзіця. Увесь час аддаю дзецям, а таксама падтрымліваю пратэсты супраць акумулятарнага заводу. Стараемся дапамагаць, наколькі можам. Пра завод даведаліся год таму, і нас тады абурыла, што яго пачалі будаваць употайкі, не спытаўшыся ў людзей».
«Сям’я мяне падтрымлівае»
Юлія расказала, што муж Іван падтрымлівае яе ў пратэсьце супраць заводу.
«Падтрымлівае, і зараз супакойваў, падказваў дзесьці, як сябе паводзіць у судзе. Усё-ткі суд — такое ня вельмі прыемнае месца, асабліва непрыемна, калі цябе вінавацяць, а ты мусіш шукаць словы, каб апраўдвацца за дзеяньні, якія ня лічыш незаконнымі. А муж падтрымлівае заўсёды, разам, усёй сям’ёй, ходзім у нядзелі і галубоў карміць. Такім чынам праводзім і час разам зь дзецьмі. Дый увогуле гэта ўсё дзеля іх».
Юлія Нічыпарук
Старэйшы сын ужо разумее, што адбываецца, кажа Юлія.
«Ён нават часам задае пытаньні, якія яму складана патлумачыць. Кшталту, навошта будаваць завод, калі ён шкодны? Як самі разумеем, так і тлумачым — што некаторым важнейшыя грошы, чым здароўе многіх людзей. Дзеці ўсё чуюць і цудоўна разумеюць».
Юлія кажа, што рыхтуецца да пратэстаў і ў тым выпадку, калі акумулятарны завод запусьцяць.
«Мы абмяркоўвалі гэтае пытаньне, але адназначнага адказу пакуль ня маем. Натуральна, што прадпрымаць нешта будзем. Першы наш крок — зьбіраемся здаць аналізы на ўтрыманьне сьвінцу і іншых шкодных рэчываў да таго, як завод запушчаны. І праз пэўны час будзем рабіць паўторна. А далей ужо будзем вырашаць, што з гэтым рабіць — куды пераяжджаць. Усё ўпіраецца ў фінансы. Мы вельмі шмат часу і высілкаў уклалі ў будаўніцтва свайго дому».
Юлія кажа, што яны з мужам заўсёды імкнуліся быць законапаслухмянымі грамадзянамі, выхоўваць дзяцей у патрыятызьме.
«А цяпер нашае разуменьне перавярнулася. І як нам цяпер расказваць сваім дзецям і пра справядлівасьць, і пра праўду, калі мы самі ўжо ў гэта перастаём верыць?»
Пратэсты супраць акумулятарнага заводу ў Берасьці. Што важна ведаць
Месцазнаходжаньне новага акумулятарнага заводу пад Берасьцем
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.