«Улады загадалі прыпыніць будоўлю». Новыя падрабязнасьці пра будаўніцтва бізнэс-цэнтру каля парку Чалюскінцаў

Будоўля бізнэс-цэнтру, 30 сьнежня

Старшыня Менгарвыканкаму Анатоль Сівак загадаў прыпыніць будоўлю бізнэс-цэнтру каля парку Чалюскінцаў. Пра гэта Свабодзе распавялі мясцовыя жыхары, якія трапілі сёньня на сустрэчу з кіраўніком гораду.

15 студзеня Свабода пісала, што гарадзкая пракуратура Менску знайшла парушэньні пры праектаваньні бізнэс-цэнтру ў двары паміж вуліцай Талбухіна і праспэктам Незалежнасьці. Выявілася, што забудоўшчык падаў на экспэртызу несапраўдныя дакумэнты.

На месцы бізнэс-цэнтру ў 1990-я гады быў дзіцячы садок

Як сёньня стала вядома, 22 студзеня Камітэт архітэктуры і горадабудаўніцтва адправіў ліст кампаніі-забудоўшчыку — СААА «Вецер». У ім гаворыцца, што камітэт прыпыняюць дзеяньне заключэньня ад 2017 году, якое дазваляла будаўніцтва. Пасьля гэтага дзеяньне свайго заключэньня прыпыніла і «Галоўбудэкспэртыза».

«На сёньня гэтая будоўля самавольная, — сказала Свабодзе Галіна Сінілевіч, якая была на прыёме. — І сам „Вецер“ павінен прыпыніць будаўніцтва».

Галіна Сінілевіч

Але мясцовыя жыхары кажуць, што будоўля ня толькі не прыпынілася, а ідзе яшчэ нават больш інтэнсіўна, чым раней.

У кампаніі «Вецер» Свабодзе пацьвердзілі, што ліст зь Менгарвыканкаму яны атрымалі. І даслалі ў Менгарвыканкам просьбу патлумачыць сваё рашэньне.

«Павінна быць тлумачэньне, што далей з усім гэтым рабіць. Пакуль камэнтароў ніякіх няма зь іх боку, — сказаў Свабодзе праз тэлефон кіраўнік праекту Кірыл Шчасновіч. — Мы гатовыя карэктаваць праект і прыводзіць яго ў адпаведнасьць».

Сёньня вядзецца будаўніцтва апошняга чацьвёртага паверху

Па словах Шчасновіча, будоўля не спыняецца, бо кампаніі ніхто не даслаў прамой забароны. Такое прадпісаньне можа выдаць пракуратура ці інспэкцыя Дэпартамэнту па кантролі і наглядзе за будаўніцтвам па Менску.

«І мэр гораду загадаў прыпыніць будоўлю, — сказала Галіна Сінілевіч.

Мясцовыя жыхары спадзяюцца, што будоўля прыпыніцца ў хуткім часе. Сёньня яны перадалі Анатолю Сіваку заяву з 72 подпісамі. У ёй гаворыцца, што жыхары раёну не давяраюць забудоўшчыку.

«Мы пералічылі ўсе парушэньні, — сказала Галіна Сінілевіч. — Патрабуем забраць участак у гэтага забудоўшчыка, бо ён працуе па падложных дакумэнтах».

ГЛЯДЗІЦЕ ТАКСАМА: Каля парку Чалюскінцаў у Менску высекуць 273 дрэвы. Тут будуюць бізнэс-цэнтар