Да гадавіны сьмерці Міхала Анемпадыстава на сайце TuzinFM прэзэнтавалі аўдыёрэліз, у які ўвайшлі песьні на ягоныя словы ў выкананьні Лявона Вольскага, Касі Камоцкай і Зьмітра Вайцюшкевіча.
Як адзначаецца ў прэс-рэлізе, запіс рабіўся на пляцоўцы Belsat Music Live «у абставінах вялікага шоку», на чацьвёрты дзень пасьля сьмерці Міхала Анемпадыстава. Запіс і зьвядзеньне зрабіў Андрэй Акатаў.
За сем гадзінаў у студыі былі запісаныя ўжывую 7 песень.
ГЛЯДЗІЦЕ ТАКСАМА: Вянок памяці. Паэт і мастак Міхал Анемпадыстаў
Беларускі дызайнэр, графік, фатограф, паэт і перакладчык, аўтар «Народнага альбому» Міхал Анемпадыстаў памёр 24 студзеня ва ўзросьце 53 год.
Вершы Міхала Анемпадыстава сталі песьнямі N.R.M., «Новага Неба», Зьмітра Вайцюшкевіча, IQ48 і іншых, ён быў аўтарам славутага «Народнага альбому» (прызнанага «Альбомам году» на «Рок-каранацыі-1997»), перакладаў польскія рок-гіты для беларускіх сьпевакоў. «Чалавек году-2006» па вэрсіі інтэрнэт-парталу «Тузін гітоў».
У 2013 годзе выдаў зборнік сваіх вершаў «Глыбока, глыбока, на дне філіжанкі кавы», у 2017 — кнігу «Колер Беларусі». Таксама Анемпадыстаў ствараў вокладкі для музычных альбомаў. Вёў на сайце кампаніі «Будзьма беларусамі!» калёнку «Простыя рэчы».