Расея часткова разблякавала ўкраінскія парты на Азоўскім моры. Пра гэта паведаміў міністар інфраструктуры Украіны Ўладзімір Амялян.
Паводле яго слоў, назіраецца рух суднаў праз Керчанскую пратоку ў напрамку ўкраінскіх партоў Бярдзянск і Марыюпаль. Судны спыняюцца расейскім бокам і аглядаюцца, як і раней, паведаміў украінскі міністар. Ён таксама дадаў, што ўваходу ў Азоўскае мора чакаюць 17 караблёў, выхаду ў Чорнае мора — адзін карабель. Яшчэ дзевяць суднаў стаяць каля прычалаў ў партах.
Разблякаваньне ўкраінскіх партоў стала магчымым, у тым ліку, дзякуючы «жорсткай і адназначнай міжнароднай рэакцыі» на дзеяньні Расеі, падкрэсьліў Амялян і выказаў надзею, што ў бліжэйшыя дні ўкраінскія парты будуць разблякаваныя цалкам, а наступным крокам стане вызваленьне арыштаваных расейскімі ўладамі ўкраінскіх маракоў.
Раней прэзыдэнт Украіны Пётр Парашэнка заявіў, што Кіеў рыхтуе пазоў у Міжнародны суд ААН з патрабаваньнем прызнаць адказнасьць Расеі за акт агрэсіі ў Керчанскай пратоцы. Для вяртаньня ўкраінскіх маракоў і прызнаньня расейскай агрэсіі неабходна «аб’яднаць намаганьні ўсяго сьвету», адзначыў Парашэнка.
Што трэба ведаць пра канфлікт Украіны і Расеі ў Азоўскім моры
Расея 25 лістапада заблякавала выхад украінскіх караблёў, якія плылі да Марыюпалю праз Керчанскі праліў, каб трапіць у Азоўскае мора. Тры ўкраінскія караблі і больш за 20 украінскіх маракоў захопленыя расейскімі вайскоўцамі.
- Раніцай 25 лістапада расейскі сухагруз перагарадзіў Керчанскую пратоку перад трыма ўкраінскімі суднамі, якія ажыцьцяўлялі плянавы пераход з порту Адэсы ў порт Марыюпаль Азоўскага мора. Пазьней расейскі пагранічны карабель пратараніў буксір Вайскова-марскіх сіл Узброеных сіл Украіны.
- Расейскія вайсковыя караблі з дапамогай авіяцыі і спэцназу атакавалі і захапілі пашкоджаны ўкраінскі буксір і два малыя браняваныя артылерыйскія катэры. Шэсьць украінскіх маракоў былі параненыя, двое зь іх у цяжкім стане.
- Паводле Расеі, украінскія караблі спрабавалі прайсьці празь Керчанскую пратоку незаконна. Украіна адкідае гэтае абвінавачваньне, спасылаючыся на міжнародныя і міжурадавыя пагадненьні.
- Ці праўда, што ўкраінскія караблі парушылі расейскую мяжу ў Азоўскім моры?
- Ва Ўкраіне абʼявілі ваеннае становішча з 28 лістапада да 27 сьнежня. Узброеныя сілы Ўкраіны прыведзеныя ў поўную баявую гатоўнасьць.
Дзе ва Ўкраіне ўвялі ваеннае становішча
- Канфлікт у Азоўскім моры паміж Украінай і РФ узьнік пасьля ўвядзеньня ў эксплюатацыю моста ў анэксаваны Крым. Украіна заяўляе, што Расея на падставе праверак затрымлівае дзясяткі суднаў, якія ідуць ва ўкраінскія азоўскія парты. Паводле Масквы, праверкі ўкраінскіх суднаў законныя.
- Рада Бясьпекі ААН склікала 26 лістапада экстранае паседжаньне ў сувязі з рэзкім абвастрэньнем сытуацыі ў Керчанскім праліве, шэраг эўрапейскіх краінаў асудзілі дзеяньні Расеі ў Азоўскім моры.
- Суд Сімферопаля на два месяцы арыштаваў 24 украінскіх маракоў, захопленых расейскімі сілавікамі. Украінская пракуратура прызнала іх ваеннапалоннымі.
- Украіна на час дзеяньня ваеннага становiшча забараніла ўезд у краіну мужчынам – грамадзянам Расеі ва ўзросьце ад 16 да 60 гадоў.
- У верасьні 2019 году адбыўся абмен палоннымі паміж Расеяй і Ўкраінай, падчас якога захопленыя маракі вярнуліся ва Ўкраіну.