Андрусь Кешанюк дайшоў да Вярхоўнага суду, каб аспрэчыць адміністрацыйнае спагнаньне за аднаасобную несанкцыянаваную акцыю. Таксама ён напісаў заяву, каб вярнулі ягоную маёмасьць.
Вярхоўны суд не адмяніў накладзеных штрафаў, але пастанавіў вярнуць адабраныя «рэчавыя доказы».
Сьцяг быў канфіскаваны паводле рашэньня Першамайскага райсуду Віцебску, які абінаваціў Кешанюка за віншаваньні калег, супрацоўнікаў віцебскага «Белтэлекаму», са стагадовым юбілеем Беларускай Народнай Рэспублікі. Падчас суду міліцыянты Васіль Кароткі і Расьціслаў Чэкан заявілі, што затрыманы «чапляўся нагамі за зямлю» — у гэтым і праявілася ягонае непадпарадкаваньне.
ГЛЯДЗІЦЕ ТАКСАМА: Двух жыхароў Віцебску асудзілі за віншаваньні з Днём ВоліКешанюк не адмаўляў, што разгарнуў сьцяг каля будынка «Белтэлекаму», але сьведчаньні амапаўцаў аб непадпарадкаваньні назваў хлусьнёй. Судзьдзя Натальля Карабліна аштрафавала яго за незаконнае пікетаваньне і за непадпарадкаваньне супрацоўнікам міліцыі на 10 базавых велічынь (245 рублёў). Суд пастанавіў таксама сканфіскаваць «атрыбут пікетаваньня» — бел-чырвона-белы сьцяг.
Гэтую пастанову Андрусь Кешанюк спрабаваў аспрэчыць праз абласны суд, але безвынікова. Вярхоўны суд вырашыў зьмяніць вырак актывісту, але не цалкам: штрафы прызналі законнымі, а канфіскацыю — не.
Старшыня Вярхоўнага суду Валянцін Сукала разгледзеў у парадку нагляду адміністрацыйную справу Андруся Кешанюка і пастанавіў выключыць з пастановаў згадку пра канфіскацыю рэчавых доказаў. Бо гэта не прадугледжана ніводным з артыкулаў, паводле якіх актывіста пакаралі.