У другой палове дня 28 лістапада прэсавая сакратарка Аб’яднанай грамадзянскай партыі Ганна Красуліна перадала ва Ўпраўленьне ўнутраных спраў Менскага гарвыканкаму скаргу на рашэньне аб высылцы з тэрыторыі Беларусі.
Актывістка АГП выказвае сваю нязгоду з рашэньнем упраўленьня ўнутраных спраў Маскоўскага раёну Менску ад 13 лістапада 2018 году, паводле якога яе высылаюць зь Беларусі «у мэтах інтарэсаў грамадзкага парадку праз добраахвотны выезд з краіны» тэрмінам на адзін год.
Далей Красуліна выкладае прычыны, чаму яна лічыць такое рашэньне «неабгрунтаваным і незаконным». Яна просіць:
- адмяніць пастанову аб высылцы;
- прыпыніць высылку на час абскарджваньня рашэньня.
Што будзе далей?
У размове са Свабодай актывістка АГП спрагназавала свой далейшы лёс.
«Паводле заканадаўства гарадзкая міліцыя мае тэрмін да аднаго месяца для разгляду маёй скаргі. Звычайна на гэты час высылка прыпыняецца. Затым мне павінны ў пісьмовым выглядзе паведаміць рашэньне. Калі яно мяне не задаволіць, то я маю права зьвярнуцца са скаргай у суд. Суд таксама мае час да аднаго месяца, каб вывучыць маю апэляцыю. Таму я спадзяюся, што сёлета мяне зь Беларусі ніхто ня вышле», — кажа Ганна Красуліна.
ГЛЯДЗІЦЕ ТАКСАМА: Актывістка АГП Красуліна, якой пагражае высылка зь Беларусі, паскардзілася ў амбасаду РасеіМЗС Беларусі: расейская нота па справе Красулінай сапраўды ёсьць
Сёньня ў прэсавай службе замежнапалітычнага ведамства Беларусі Свабодзе пацьвердзілі, што амбасада Расеі зьвярнулася ў МЗС з адмысловай нотай наконт Ганны Красулінай.
«Мы пацьвярджаем атрыманьне ноты. Гэтае пытаньне будзе разглядацца ва ўстаноўленым парадку кампэтэнтнымі органамі».
Раней прэсавы сакратар расейскай амбасады ў Беларусі Аляксей Маскалёў заявіў, што амбасада накіравала зварот у МЗС «з просьбай улічыць усе гуманітарныя абставіны яе справы пры разглядзе заявы аб адмене рашэньня аб высылцы».
Ён падкрэсьліў, што расейскі бок разглядае Красуліну ня як палітычную дзяячку, а як расейскую грамадзянку, якой амбасада павінна пры неабходнасьці аказваць прававую дапамогу.
Што важна ведаць пра высылку Ганны Красулінай?
Міграцыйная служба Міністэрства ўнутраных спраў паведаміла 13 лістапада прэс-сакратарцы АГП Ганьне Красулінай пра рашэньне аб яе высылцы «ў інтарэсах грамадзкага парадку».
Ганна Красуліна
Прычынай для высылкі Красулінай сталі адміністрацыйныя правапарушэньні:
- пікет падчас выбарчай кампаніі;
- сустрэча з ізалятара затрыманых;
- сплачаны на месцы штраф за неаплачаны праезд.
У АГП лічаць, што матывы дэпартацыі — палітычныя.
Тэрмін высылкі: 1 год.
Хто такая Красуліна?
Ганна Красуліна нарадзілася ў Расеі і мае расейскае грамадзянства. У Беларусь яна пераехала ў 2002 годзе. Муж і дзеці Красулінай маюць беларускае грамадзянства. Сваіх бацькоў Красуліна перавезла ў Беларусь.
Красуліна мае пасьведчаньне на жыхарства ў Беларусі да 30 студзеня 2019 году.
Каго яшчэ высылалі і дэпартавалі зь Беларусі?
У 2011 годзе беларускія ўлады дэпартавалі з краіны журналіста газэты «Маскоўскі камсамолец» Ігара Кармазіна, заявіўшы, што ён нясе пагрозу бясьпецы краіны.
Алена Танкачова
У 2014 годзе ўлады пазбавілі віду на жыхарства і дэпартавалі на 3 гады праваабаронцу Алену Танкачову. Сёлета Танкачова атрымала дазвол на часовае пражываньне ў Беларусі.
Карэспандэнта тэлеканалу НТВ Аляксандра Ступнікава ў 1997 годзе пазбавілі акрэдытацыі і выслалі зь Беларусі. У 2003 годзе прадстаўніцтва НТВ у Беларусі зачынілі, а яго кіраўніка Паўла Селіна дэпартавалі з краіны бяз права ўезду тэрмінам на 5 гадоў. У 2009-м зь Беларусі дэпартавалі журналістаў расейскай тэлекампаніі НТВ Аляксея Малкава і Юрыя Бабенку, якія здымалі сюжэт пра зьніклых апазыцыянэраў.
У 2006-м дэпартавалі расейскага палітоляга Андрэя Суздальцава.
Агнешка Рамашэўская
13 сьнежня 2005 году карэспандэнтцы Польскага тэлебачаньня Агнешцы Рамашэўскай было адмоўлена ва ўезьдзе ў Беларусь, нягледзячы на дзейную візу і гадавую акрэдытацыю Міністэрства замежных спраў Беларусі.
У чэрвені 2004-га за парушэньне «правілаў знаходжаньня замежных грамадзянаў» дэпартавалі ва Ўкраіну на 5 гадоў намесьніка рэдактара газэты «Время» Міхаіла Падаляка.