Прэмія Honorary Central European («Ганаровы грамадзянін Цэнтральнай Эўропы») ўручаецца за ўнёсак у разьвіцьцё дэмакратыі і грамадзянскай супольнасьці.
Нобелеўская ляўрэатка ў літаратуры 2015 году Сьвятлана Алексіевіч стала першай уладальніцай новай прэміі, паведамляе Беларускі ПЭН-цэнтар.
Узнагарода заснаваная сёлета Цэнтральнаэўрапейскім форумам (CEF) — міжнароднай арганізацыяй, якая існуе 10 гадоў. У кансультатыўную Раду ўваходзяць такія вядомыя інтэлектуалы, як Адам Міхнік (Польшча), Міклаш Харасьці (Вугоршчына), Славенка Дракуліч (Харватыя), іншыя эўрапейскія дзеячы культуры і палітыкі.
«Ваша прысутнасьць на цырымоніі — гонар для народу маёй краіны», — напісаў у запрашальным лісьце прэзыдэнт Славацкай Рэспублікі Андрэй Кіска. Ён пры гэтым адзначыў «надзвычайную важнасьць справы», якую робіць беларуская пісьменьніца.
Цырымонія ўручэньня прэміі, прымеркаваная да ўгодкаў падзеяў 1989 году ў Чэхаславаччыне, прайшла ў Браціславе на плошчы Славацкага нацыянальнага паўстаньня. Падчас цырымоніі быў зачытаны ўрывак з кнігі Сьвятланы Алексевіч «Час сэканд-хэнд» у славацкім перакладзе.