Пасьля чарговага затрыманьня 13 лістапада берасьцейскі блогер Сяргей Пятрухін правёў ноч у ізалятары Ленінскага РАУС.
Сёньня ягоныя паплечнікі чакалі, што Пятрухіна прывязуць у суд, аднак яму ўручылі дзьве позвы — у суд і міліцыю — і адпусьцілі.
«Калі затрымалі, мяне абвінавацілі ў тым, што я не зьявіўся па позьве ў міліцыю ў нядзелю 4 лістапада. Але я дамовіўся з участковым, які мяне выклікаў, што ў выпадку, калі не прыйду, то паведамлю ў пастарунак. Я так і зрабіў: выклаў паважлівую прычыну, чаму не магу прыйсьці. Сказаў, што гатовы ў любы іншы дзень, але не ў выходныя. Наогул лічу, што гэта зьдзек — выклікаць чалавека ў выходны дзень», — кажа Сяргей Пятрухін.
ГЛЯДЗІЦЕ ТАКСАМА: «ОМОН — сила!». Берасьцейскі блогер Пятрухін выказаў «падзяку» міліцыі на дзьвярах сваёй кватэрыНа блогера склалі пратакол, што ён не зьявіўся ў міліцыю, і сёньня раніцай выдалі позву ў суд на 16 лістапада.
«Учора мяне пасадзілі ў ізалятар — маўляў, каб я не схаваўся да суду. Сёньня павінны былі судзіць. Аднак далі позву на пятніцу і адпусьцілі», — зьдзіўлены такім паваротам Пятрухін.
Апроч таго, актывісту выдалі яшчэ і позву зьявіцца ў міліцыю ў наступную нядзелю, 18 лістапада, якраз у час, калі звычайна на плошчы зьбіраюцца праціўнікі будаўніцтва акумулятарнага заводу.
Блогеры Сяргей Пятрухін і Аляксандар Кабанаў ад пачатку году асьвятляюць пратэсты супраць узьвядзеньня заводу ў Берасьці. Іх неаднаразова судзілі, яны адбывалі суткі і сплочвалі штрафы.
Паводле Пятрухіна, агулам яму прысуджана болей за 3500 эўра штрафаў. На выплату многіх складаюцца пратэстоўцы.
ГЛЯДЗІЦЕ ТАКСАМА: Берасьцейскага блогера асудзілі за заклік да пратэсту праз Youtube