Падазраванага ў зьбіцьці кіроўцы менскай маршруткі ўзялі пад варту, піша агенцтва «Мінск-Навіны» са спасылкай на прадстаўніцу Сьледчага камітэту Юлію Ганчарову.
Кіроўцу маршрутнага таксі 32-гадовага Анатоля апоўдні 24 кастрычніка пабілі ў Менску кіроўцы легкавікоў з расейскімі нумарамі. Маршрутчык расказваў, што ад’яжджаў ад прыпынку, аб’ехаў трактар і вярнуўся на сваю паласу, але праз пару сэкундаў перад ім спынілася белая Hyundai, збоку стаў чорны Mercedes. З абодвух аўтамабіляў выскачылі кіроўцы, выцягнулі яго з машыны са словамі: «Чаго ты лезеш не ў сваю паласу?». Адзін трымаў Анатоля, другі ўдарыў яго кулаком у твар, пасьля абодва зьехалі.
Падазраваных затрымалі, аднаго зь іх узялі пад варту. Паводле ч.2 арт. 339 КК Беларусі за хуліганства, зьдзейсьненае групай асоб, падазраваным пагражае да 6 гадоў турмы.
Юлія Ганчарова ўдакладніла, што абодва падазраваныя — грамадзяне Расеі. Раней паведамлялася, што маршрутчыка зьбілі жыхар расейскага Стаўрапаля і жыхар азэрбайджанскага Баку.