14 кастрычніка на акцыю супраць будаўніцтва акумулятарнага заводу ў Берасьці выйшлі некалькі дзясяткаў чалавек. Да іх далучыўся адзін з апазыцыйных лідэраў Мікола Статкевіч.
Мікола Статкевіч у Берасьці
На пачатку акцыі стала вядома пра аднаго затрыманага актывіста — Дзьмітрыя Бекалюка.
Паводле ацэнкі праваабаронцы Рамана Кісьляка, на плошчу ў Берасьці выйшла болей як 120 чалавек.
Акцыя завершылася нестандартна. Каля 13-й гадзіны людзі самі падышлі да аўтазака і спыталіся ў амапаўцаў, ці будуць тыя забіраць блогераў Пятрухіна і Кабанава.
Адразу ж да аўтазака падбегла каля двух дзясяткаў амапаўцаў. Яны схапілі Сяргея Пятрухіна і Аляксандра Кабанава, а таксама Міколу Статкевіча.
Аўтазак зьехаў у Ленінскае РАУС. Людзі, якія засталіся, вырашылі ісьці пастарунка, каб падтрымаць затрыманых. Але праз 100 мэтраў два міліцэйскія УАЗы забралі яшчэ двух пратэстоўцаў — Віталя Казака і Ўладзімера Мароза.
Затрымалі таксама Рыгора Пагарцава з «Народнай грамады» і яшчэ дваіх чалавек, імёны якіх пакуль не вядомыя.
А 15-й гадзіне з пастарунка адпусьцілі Дзьмітрыя Бекалюка, затрыманага да пачатку акцыі. Некалькі гадзін ён быў у міліцыі разам са сваім малым сынам.
Сходы праціўнікаў будаўніцтва акумулятарнага заводу адбываюцца ў Берасьці некалькі месяцаў штонядзелі.
Звычайна яны абыходзіліся без затрыманьняў. Людзі зьбіраліся на плошчы «каб пакарміць галубоў» і не выкрыквалі ніякіх лёзунгаў.
Затрымліваць удзельнікаў пачалі цягам апошніх двух тыдняў. Некалькіх пратэстоўцаў аштрафавалі.
10 кастрычніка 7 актывістаў атрымалі папярэджаньні пракуратуры аб недапушчальнасьці ўдзелу ў несанкцыянаваных акцыях. У іх ліку і блогеры Сяргей Пятрухін і Аляксандар Кабанаў. Пасьля гэтага яны выклалі на сваім канале заклік выйсьці на плошчу.
Пратэсты супраць акумулятарнага заводу ў Берасьці. Што важна ведаць
Месцазнаходжаньне новага акумулятарнага заводу пад Берасьцем
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.