Зламысьнікі маглі выкрасьці інфармацыю ўладальнікаў профіляў пры дапамозе функцыі «Паглядзець як». Яна дазваляе паглядзець на старонку так, як яе бачаць іншыя карыстальнікі.
У кіраўніцтве сацыяльнай сеткі запэўнілі, што праблема з бясьпекай ужо ліквідаваная. Facebook праінфармаваў праваахоўныя органы аб узломе. Расьсьледаваньне інцыдэнту знаходзіцца на раньняй стадыі, заявілі ў кампаніі.
Хакеры скралі так званыя «маркеры доступу» — гэта лічбавыя ключы, якія дазваляюць карыстальнікам ня ўводзіць зноў пароль кожны раз, калі яны заходзяць у сацыяльную сетку.
Карпарацыя сьцьвярджае, што скінула ня толькі 50 мільёнаў «маркераў доступу», якія апынуліся пад пагрозай, але і ключы 40 мільёнаў іншых уладальнікаў акаўнтаў.