Яшчэ адно самагубства. Цела 26-гадовага вайскоўца знайшлі ў лесе на Горадзеншчыне

У лясным масіве ў Горадзенскай вобласьці знойдзена цела вайскоўца зь перадсьмяротнай запіскай, паведамілі ў Міністэрстве абароны Беларусі ў нядзелю.

«8 верасьня каля 18.00 у лясным масіве знойдзена цела вайскоўца адной з вайсковых частак Горадзенскага гарнізона, які 5 верасьня пакінуў вайсковую частку і знаходзіцца ў вышуку», — праінфармавалі ў Мінабароны.

Ваеннаслужачы 1991 года нараджэньня, праслужыў каля 16 месяцаў.

«Па выніках папярэдніх сьледчых дзеяньняў, прычына сьмерці мае асабліва асабісты характар, пра што сьведчыць знойдзеная пры ім перадсьмяротная запіска», — праінфармавалі ў ведамстве.

Сьледчы камітэт і камісія Мінабароны праводзяць праверку па факце гібелі.

У дзяжурнай частцы вайсковага камісарыяту Горадзенскай вобласьці Свабодзе пацьвердзілі факт суіцыду, але ад дадатковых камэнтароў адмовіліся.

«Камандаваньне будзе ў панядзелак, тады, магчыма, зьявіцца новая інфармацыя», — адказаў дзяжурны на просьбу ўдакладніць узрост салдата, які зьдзейсьніў самагубства, і паведаміць, калі і дзе адбудзецца пахаваньне.

Стрыечная сястра: Сяргей прасіў мяне пераводзіць грошы на невядомую картку

Са Свабодай зьвязалася стрыечная сястра салдата Вольга. Яна паведаміла, што імя загінулага Сяргей Сяргеевіч Ясюкевіч, ён нарадзіўся 17 сьнежня 1991 году.

«Ён чалавек нялёгкага лёсу. У маладым узросьце трапіў пад уплыў кепскай кампаніі і два разы быў судзімы за крадзеж. Але ў турме ня быў, у якасьці пакараньня было вольнае пасяленьне. Калі вярнуўся, троху працаваў у Маскве.

Калі яму было 25 гадоў, некалькі разоў казаў мне, што хоча пайсьці ў войска і застацца там працаваць па кантракце. Але праблема ў тым, што з судзімасьцю вельмі цяжка трапіць у войска. Ведаю, што ён некалькі разоў да ваенкама ў Навагрудак, прасіўся. У выніку ўзялі, пачаў служыць», — распавяла Вольга.

Яна ўдакладніла, што Сяргей Ясюкевіч нарадзіўся ў вёсцы Ятра, пад Навагрудкам. Яго бацька даўно памёр, маці цяпер жыве ў Навагрудку разам з дачкой.

«Падчас яго службы мы трымалі кантакт, перапісваліся ў «ВКонтакте». Ён пэрыядычна прасіў грошы — то 10, то 20, а то і 50 рублёў. Калі пытала, навошта, адказваў няўцямна, маўляў на цыгарэты. Ён дасылаў мне нумар карткі ці невядомыя мне нумары тэлефонаў, куды трэба было перавесьці грошы. Памятаю, што я нават абуралася, чалавек жа нібыта знаходзіцца на дзяржаўным забесьпячэньні, а тут немалыя грошы просіць», — дадала Вольга.

Далей жанчына сказала, што ёй вядома пра тое, што Сяргею ў чэрвені прастрэлілі руку, ён знаходзіўся на лячэньні ў Менску.

«У афіцыйнай заяве гаворыцца, што Сяргей зьнік у сераду, 5 верасьня. Наша сям'я лічыць, што гэта не зусім так. Справа ў тым, што ўжо некалькі тыдняў мне, а таксама яго роднай сястры, якая жыве ў Навагрудку, і брату, які жыве ў Маскве, тэлефануюць з вайсковых органаў і пытаюцца, ці ня ведаем мы, дзе Сяргей, а таксама, з кім ён камунікаваў. Да яго роднай сястра, якая цяпер знаходзіцца ў радзільным доме на захаваньні, прыходзілі вайскоўцы і пыталіся, дзе Сяргей. У гэтай гісторыі вельмі шмат нявысьветленага, і я нават ня ведаю, што думаць. Пра сьмерць Сяргея мне сказаў брат з Маскву, яму тады пазванілі і паведамілі», — дадала Вольга.

Яна сказала, што ня верыць афіцыйнай вэрсіі Мінабароны і зьвязвае сьмерць брата з пазастатутнымі адносінамі ў частцы.

ГЛЯДЗІЦЕ ТАКСАМА: «Быў залаты хлопец!» Маці салдата, якога знайшлі ў пятлі ў Слоніме, падазрае дзедаўшчыну

5 верасня ў адной з вайсковых частак Слонімскага гарнізона зьдзейсьніў суіцыд 20-гадовы салдат тэрміновай службы Аляксандар Арлоў, да заканчэння службы якому заставалася крыху больш за паўгады. Паводле інфармацыі Мінабароны, «папярэдне прычына суіцыду абумоўлена асабістымі абставінамі і не зьвязаная з праходжаньнем вайсковай службы».

ГЛЯДЗІЦЕ ТАКСАМА: Колькі салдатаў загінула ў войску пасьля Аляксандра Коржыча. Сьпіс