Сустаршыня БХД Павал Севярынец, адзін з кіраўнікоў пікетоўцаў у Курапатах, асуджаны на 10 сутак адміністрацыйнага арышту. Працэс адбыўся ў Менскім раённым судзе.
Гэта ўжо трэці ягоны 10-суткавы арышт за 3 месяцы пікетаваньня рэстарацыі «Поедем поедим».
«Калі раней Паўла каралі за выхад на праезную частку, несанкцыянаваную масавую акцыю ці непадпарадкаваньне, дык цяпер за тое, што заклікаў на сход у Курапатах 9 верасьня, — паведаміла актывістка Вольга Мікалайчык. — Палічылі, што гэта незаконна. Севярынец не адмаўляў, што заклікаў людзей на сход і нават запрасіў туды судзьдзю і сьведак-міліцыянтаў. А яшчэ сказаў, што людзі прыйдуць і будуць далей бараніць наш нацыянальны нэкропаль, бо гэта сьвятая для беларусаў справа».
Тэрыторыя забаўляльнай установы побач з Курапатамі
Паводле актывісткі, суд над Паўлам Севярынцам доўжыўся меней за гадзіну. З працэсу была выдаленая жонка Севярынца Вольга, якая прышла ў суд з малым дзіцем.
Трэцяга верасьня на прэсавай канфэрэнцыі абаронцаў Курапатаў Павал Севярынец паведаміў пра намер правесьці 9 верасьня а 16-й гадзіне сход абаронцаў Курапатаў і неабыякавых грамадзянаў, каб вырашыць, ці варта далей пікетаваць забаўляльны комплекс.
«Калі прыйдзе шмат людзей, гэта будзе азначаць, што пікетаваньне трэба працягваць. Калі нас будзе мала, будзем шукаць іншыя формы барацьбы», — казаў Павал Севярынец на прэсавай канфэрэнцыі.
Паводле палітыка, ён праінфармаваў аб правядзеньні сходу выканкам Менскага раёну. Маці актывіста Тацяна Севярынец так пракамэнтавала Свабодзе дзеяньні сына.
«Сход вельмі патрэбен, а паколькі гэта народны сход, а ня мітынг, дык ніякага дазволу на яго ня трэба, паводле закону якраз і дастаткова інфармаваньня выканаўчага органа ўлады. Але ўлады ня лічацца з законам, ім абы не дазволіць людзям згуртавацца вакол важнай справы», — мяркуе Тацяна Севярынец.
Пікетаваньне рэстарацыі
Пікетаваньне рэстарацыі побач з Курапатамі працягваецца ад пачатку чэрвеня. Пікетоўцы патрабуюць закрыцьця рэстарацыі, якая, як яны лічаць, знаходзіцца ў ахоўнай зоне народнага мэмарыялу і парушае ўсе нормы маралі.
За час пікетаваньня на актывістаў складзена блізу 200 пратаколаў, дзясяткі разоў іх штрафавалі і арыштоўвалі на суткі. Цяпер адбываюць адміністрацыйныя арышты Максім Вінярскі і Дзяніс Урбановіч, якіх затрымалі 1 верасьня.
Пратэсты супраць рэстарацыі ля Курапатаў. Што важна ведаць
Што адбываецца. Грамадзкія і палітычныя актывісты з чэрвеня 2018 году пікетуюць рэстаран «Поедем поедим», што месьціцца ля Курапатаў. За 50 мэтраў ад гэтага месца ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
З чаго ўсё пачалося. Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
Рэстаран каля Курапат не парушаў зоны аховы? МАПЫ
1 чэрвеня 2018 рэстаран «Поедем поедим» пачаў рэклямавацца ў інтэрнэце я, а ўвечары 5 чэрвеня меркавана пачаў працаваць.
З таго часу грамадзкія актывісты штодня пікетуюць рэстаран, патрабуючы яго закрыцьця і сьцьвярджаючы, што ён парушае ахоўную зону вакол народнага мэмарыялу і не адпавядае нормам грамадзкай маралі.
Як праходзяць пратэсты. Са сьцягамі і плакатамі абаронцы Курапатаў блякавалі транспарт, які накіроўваўся на тэрыторыю рэстарана. За гэта рэгулярна атрымліваюць штрафы ад ДАІ за парушэньне ПДД, а таксама іх штрафуюць і садзяць на суткі за несанкцыянаванае пікетаваньне. Некаторыя актывісты маюць ужо па некалькі дзясяткаў штрафаў.
За час пікетаваньня «Поедем поедим» неаднаразова адбываліся сутычкі паміж актывістамі і наведнікамі ды ахоўнікамі рэстарана, заблякаваныя аўтамабілі, наяжджалі на пікетоўцаў, актывісту нават зламалі руку.
Рэакцыя ўласьнікаў. Не дачакаўшыся рэакцыі ўладальнікаў рэстарана на патрабаваньне закрыць або перанесьці ўстанову, 18 ліпеня абаронцы Курапатаў заклікалі да байкоту ўсіх рэстаранаў аднаго з сузаснавальнікаў рэстарацыі бізнэсоўца Леаніда Зайдэса.
20 ліпеня на сустрэчы з журналістамі Зайдэс адмовіўся закрываць «Поедем поедим», але прапанаваў даць грошы на мэмарыялізацыю Курапатаў. Гэта не задаволіла пікетоўцаў, і яны працягнулі пікетаваньне.
Хто адказны за рэстаран у Курапатах. Сьпіс асобаў
Прадстаўнікі партый і рухаў, якія ўдзельнічаюць у Курапацкай вахце, зацьвердзілі сьпіс чыноўнікаў, уладальнікаў, агрэсіўных наведнікаў рэстарацыі «Поедем поедим», якім яны абвясьцілі пэрсанальны байкот. Усяго ў сьпісе 35 прозьвішчаў.
Бізнэсовец Аркадзь Ізраілевіч падаў у суд на незалежнае выданьне «Новы час» і аўтара расьсьледаваньня пра забудову ў Курапатах Дзяніса Івашына, які дапусьціў юрыдычную сувязь паміж ім і рэстаранам.
7 адказаў на наіўныя пытаньні пра рэстаран ля Курапатаў і пратэсты супраць яго
Ня першы чын у Курапатах. Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы.
Your browser doesn’t support HTML5
Сталінскія рэпрэсіі ў Беларусі — асноўнае, што трэба ведаць
Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 год у Курапатах — лясным масіве пад Менскам.