Сям’і з Лоева, на дапамогу якой рабілі складкі беларусы, аддалі 3-месячнага Максіма

31 жніўня Алесі Фаміных і Андрэю Коўзіку з Лоева вярнулі 3-месячнага Максіма. Малога ў прытулак забрала дзяржава — празь беднасьць бацькоў. Пасьля артыкула на Свабодзе неабыякавыя арганізацыі і беларусы дапамаглі сям’і. Патрабаваньні камісіі ў справах непаўналетніх — адрамантаваць хату, правесьці ваду, замяніць газавую пліту, назапасіць дроў былі выкананыя.

«У чацьвер была камісія. Усё праверылі, сказалі, што мы малайцы — выканалі ўсе патрабаваньні. Абяцалі аддаць Максіма. Ён быў у прытулку ў Гомлі. Учора, 31 жніўня, сына нам прывезьлі», — распавяла Алеся Фаміных.

​Сям’я вельмі ўдзячная ўсім беларусам, якія не засталіся абыякавымі, маральна і матэрыяльна дапамаглі ім.

Празь беднасьць у бацькоў забралі 3-месячнага сына

Нагадаем, 34-гадовая Алеся Фаміных нарадзіла першынца 10 траўня. Цяжарнасьць была нялёгкай, жанчына шмат часу праводзіла па бальніцах. Пасьля нараджэньня ў Максіма выявілі парок сэрца, таму малога з маці пакінулі ў бальніцы. Дома ў Лоеве ён да гэтага часу ня быў. Спачатку — праз хваробу, потым дзіця забралі ў прытулак па рашэньню камісіі па справах непаўналетніх Лоеўскага райвыканкаму.

ГЛЯДЗІЦЕ ТАКСАМА: «Атрымліваецца, калі мы бедныя, мы не павінны нараджаць». У Лоеве ўлады забралі ў бацькоў 3-месячнае дзіця. ВІДЭА

Прычынамі адабраньня Максіма чыноўнікі назвалі тое, што яго бацька злоўжываў алькаголем, у хаце — антысанітарыя, запушчаны агарод, мінімальны запас дзіцячай адзеньня, посуду. Чыноўнікі прапісалі ў рашэньні, што бацькі «сваімі паводзінамі пазбаўляюць дзіця мінімальных сацыяльных выгод, неабходных для паўнавартаснага разьвіцьця», у сям’і «адсутнічае які-кольвек прыбытак», няма водаправоду.

ГЛЯДЗІЦЕ ТАКСАМА: Апаленыя дэкрэтам № 18. За што могуць адабраць дзіця

Алеся Фаміных тлумачыла Свабодзе, што да цяжарнасьці працавала прыбіральшчыцай, мела заробак 200 рублёў. Як грамадзянскі муж часова не працаваў. Ён трапляў у поле зроку міліцыі праз злоўжываньне алькаголем. Пасьля нараджэньня малога Андрэй прайшоў лекаваньне ад алькагалізму, уладкаваўся на працу.

Жыхарка Лоева прызнае, што жыльлёвыя ўмовы не былі ў сям’і найлепшыя, але прычына гэтаму — мізэрныя заробкі, адсутнасьць працы ў райцэнтры.

ГЛЯДЗІЦЕ ТАКСАМА: Беларусы скінуліся на дапамогу сям’і з Лоева, у якой забралі 3-месячнага першынца

Маладую сям’ю неаднаразова наведвалі камісіі, якія патрабавалі выкананьня шэрагу ўмоў. Пасьля заўваг чыноўнікаў Алеся з Андрэем зрабілі невялікі рамонт, купілі новую газавую пліту, перарабілі печку і комін — згодна з патрабаваньнямі пажарных, нарыхтавалі дровы.

На правядзеньне водаправоду грошы пералічыла дабрачынная каталіцкая місія «Карытас-Міласэрнасць». Абяцае аказаць дапамогу і грамадзкае аб’яднаньне Rotary Club Minsk Сity. Яны ў бліжэйшы час наведаюць сям’ю — прывязуць неабходныя рэчы для маці і дзіцяці.

Неабыякавыя беларусы пералічылі сямʼі грошы.

Праваабаронца Леанід Судаленка дапамог Алесі Фаміных скласьці скаргу старшыні Лоеўскага райвыканкама на дзеяньні чыноўнікаў.