Прэс-служба Дзяржаўнага памежнага камітэту Беларусі і дзяжурны афіцэр памежнага атраду «Менск» пацьвердзілі Свабодзе, што грамадзяніна ЗША Алока Вайд-Мэнона адправілі назад у Амстэрдам сёньня а 9.30.
Пашпарт аддалі сцюардэсе, якая перадала яго супрацоўнікам Амстэрдамскага аэрапорта, а не асабіста Алоку.
«Бязьвіз» не дапамог: амэрыканскага пэрформэра не пусьцілі ў Беларусь
Яго не дэпартавалі, а проста не ўпусьцілі ў краіну паводле 30 артыкулу Закону аб праўным палажэньні замежных грамадзянаў і асобаў без грамадзянства. Камэнтароў, які канкрэтна пункт артыкулу парушыў грамадзянін ЗША, афіцэр і прэс-служба не далі.
Сьцісла:
- Грамадзяніна ЗША індыйскага паходжаньня Алока Вайд-Мэнона 31 ліпеня не прапусьцілі празь мяжу ў Нацыянальным аэрапорце «Менск».
- Ён прыляцеў у Беларусь па «бязьвізе» а 15-й гадзіне рэйсам з Амстэрдаму і правёў ў аэрапорце «Менск» 18 гадзінаў да наступнага рэйсу ў Амстэрдам.
- Алок Вайд-Мэнон — «індыйска-амерыканская гендарна-небінарная паэтка-пэрформэрка-транс-актывістка», як апісвае яго часопіс Makeout. Пэрформэр, які публічна выкарыстоўвае ў дачыненьні да сябе займеньнік «яны», меўся выступаць у Менску на закрытым воркшопе пра эмоцыі для ЛГБТК-людзей.
У атрадзе памежнага кантролю «Менск» Свабодзе пацьвердзілі, што Вайд-Мэнона не ўпусьцілі ў Беларусь на падставе артыкулу 30 Закону аб праўным палажэньні замежных грамадзянаў і асобаў без грамадзянства.
Паводле гэтага артыкулу адмовіць ва ўезьдзе могуць, калі знаходжаньне замежніка ў Беларусі супярэчыць:
- нацыянальнай бясьпецы;
- грамадзкай бясьпецы;
- абароне маральнасьці;
- абароне здароўя насельніцтва;
- абароне свабодаў грамадзянаў і іншых асобаў.
Вайд-Мэнон мусіў выступіць 1 жніўня з публічнай лекцыяй у Менску. Выступ «Femme in Public» мусіў спалучаць:
- паэтычны вечар «Femme in Public» паводле аднайменнай кнігі пэрформэра;
- дасьледаваньне па гендэрнай некамфортнасьці і фэміннасьці.
Алок распавядае пра свой досьвед дыскрымінацыі, вулічнага гвалту і перажываньні сыстэмнай траўмы, якія адчувае як нябелы, трансгендерны мігрант у «белай», кансэрватыўнай Амэрыцы.
24 ліпеня Аляксандар Лукашэнка павялічыў тэрмін бязьвізавага знаходжаньня грамадзянаў 80 краінаў да 30 дзён пры ўмове прылёту ў Нацыянальны аэрапорт «Менск» і вылету тым жа шляхам. «Бязьвізам» нельга скарыстацца, прыляцеўшы з Расеі, бо на гэтых рэйсах няма памежнага кантролю.
Што важна ведаць:
- 17 траўня, у Міжнародны дзень барацьбы з гамафобіяй, амбасады Вялікай Брытаніі і ЗША ў Менску вывесілі вясёлкавыя сьцягі.
- 20 траўня Міністэрства ўнутраных спраў апублікавала заяву, дзе назвала аднаполыя адносіны падробкай. У ліпені афіцыйным міліцэйскім пратаколе аўтарам заявы назвалі кіраўніка МУС Ігара Шуневіча.
- 21 траўня на сайце petitions.by пачаўся збор подпісаў «За міліцыю для ўсіх». У пэтыцыі просяць праверыць законнасьць выказваньняў МУС. На момант публікацыі пад пэтыцыяй падпісалася больш за 1800 чалавек.
- 21 траўня кіраўнік МУС Ігар Шуневіч назваў вывешваньне міжнароднага сымбалю ЛГБТ-супольнасьці прапагандай «непрымальнага» ладу жыцьця.
- 23 траўня міністар замежных справаў Уладзімер Макей заявіў, што існуе шэраг рэчаў, «непрымальных» для беларускага мэнталітэту. Макей адзначыў важнасьць і неадназначнасьць тэматыкі «правоў мяншыняў».
- 7 чэрвеня Шуневіч заявіў, што «ахова маральнасьці» — гэта функцыя МУС, хоць такой функцыі ў законе «Аб органах унутраных справаў» няма.
- 7 ліпеня супрацоўнікі брытанскай амбасады ў Менску апрануліся ў колеры ЛГБТ-сьцяга.
- За чэрвень-ліпень супрацоўнікі міліцыі зладзілі 3 аблавы падчас закрытых вечарынаў ЛГБТ-людзей і сьвінгераў. У затрыманьнях удзельнічаў АМАП. Заведзена крымінальная справа «за прастытуцыю».