34-гадовы вазочнік зь Ліды Саша Аўдзевіч упершыню ў жыцьці скокнуў з парашутам. Скачок ён прысьвяціў сваёй дзяўчыне Юліі Войцік.
3 тысячы мэтраў і 30 сэкундаў
Скачок у зьвязцы з інструктарам адбыўся днём 8 ліпеня. Вышыня — 3 тысячы мэтраў. Палёт — 30 сэкундаў. Месца Саша хоча захаваць у таямніцы. Вядома, што гэта ў Беларусі.
«Рушыў спантанна, знайшоў выпадкова. Я быў першым інвалідам, які скакаў з гэтымі хлопцамі. Я проста прыехаў і скокнуў без аніякіх інструкцый ці адмысловых курсаў, таму што гэта дужа проста і весела», — так хлопец кажа пра падрыхтоўку.
«Я думаў, што я ў іншым сусьвеце»
Ногі Саша нічым не прышпільваў
Прызнаецца, што ўсё ж вельмі баяўся, як усё пройдзе. Ногі нічым не прышпільваў і перажываў, што яны будуць матляцца ў паветры.
Пра інструктара кажа, што той асабліва не хваляваўся. І адзінае, што запытаўся, ці баіцца Саша Google Maps — як выглядае зямля з вышыні.
Але палёт прайшоў на выдатна.
«Я думаў, што я ў іншым сусьвеце, зь іншымі законамі фізыкі. Адны пазытыўныя эмоцыі», — узгадвае суразмоўца.
Інструктар толькі запытаўся, ці не баіцца Саша Google Maps
«Такая love story»
Падчас палёту хлопец склаў рукі ў форме сэрца — так ён выказаў пачуцьці да сваёй каханай Юліі, якая жыве ў Нямеччыне.
Праўда, пра ідэю палёту дзяўчына даведалася, толькі калі Саша быў ужо на аэрадроме.
Яна была ў шоку. Такая love story», — кажа Саша.
Юля працуе бізнэс-аналітыкам у фірме, якая прадае слыхавыя апараты.
Закаханыя бачацца раз на некалькі месяцаў. Пераяжджаць у Нямеччыну Саша не плянуе. Калі вырашыць, то толькі дзеля дзяўчыны, але ня дзеля краіны, бо там «сумнавата», кажа хлопец.
«Крута, калі б я скокнуў адзін на вазку»
Аднак да скачкоў з парашутам у вазочніка засталіся яшчэ пажаданьні.
«Для мяне было б крута, калі б я скокнуў адзін на вазку. А там жа гэта не зусім true», — кажа ён.
Саша мяркуе, што скачок з інструктарам не зусім сапраўдны
Хлопец мяркуе, што гэта тэхнічна мажліва. Не выключае, што наступны ягоны скачок будзе менавіта такім.
Жартуе, што другім разам зможа згатаваць і выпіць у палёце каву. Цяпер Саша ўдзельнічае ў праекце «Інклюзіўны барыста», дзе людзі на вазку вучацца працаваць у кавярні.
Папулярнасьць прыйшла, калі стаў інвалідам
Восем гадоў таму Саша Аўдзевіч разьбіўся на матацыкле. Цяпер ён самы пазнавальны вазочнік Беларусі, часта зьяўляецца на імпрэзах і на старонках мэдыя.
Вядомы ён, сярод іншага, тым, што праехаў 4 тысячы кілямэтраў па Эўропе на хэндбайку. Дзякуючы яму зьявілася першая ў Беларусі трэнажэрка для інвалідаў. Саша прымушае чыноўнікаў рабіць пандусы і асфальтаваць дарогі. У яго тысячы падпісчыкаў у сацсетках.