Прэзыдэнт ЗША Дональд Трамп распытваў памочнікаў аб мэтазгоднасьці прымяненьня сілы супраць аўтарытарнага ўраду Вэнэсуэлы. Пра гэта паведаміў тэлеканал CNN са спасылкай на высокапастаўленага супрацоўніка адміністрацыі.
Пытаньне быў узьнятае ў жніўні мінулага году на нарадзе ў Белым доме, прысьвечанай эканамічным санкцыям, якія ЗША ўводзілі тады ў дачыненьні да Каракаса. Памочнікі рашуча адгаворвалі Трампа ад інтэрвэнцыі, паказваючы на вельмі адмоўную ацэнку саюзьнікаў Вашынгтону ў Лацінскай Амэрыцы падобнага сілавога сцэнару. Ня варта рызыкаваць аднадушным асуджэньнем краінамі рэгіёну дыктатарскай палітыкі вэнэсуэльскага прэзыдэнта Мадура, падкрэсьлівалі памочнікі Трампа.
«Ніякіх апэратыўных плянаў уварваньня ў любым выпадку не існавала, —заўважыла крыніца CNN, — і прэзыдэнт проста разважаў уголас» аб розных шляхах урэгуляваньня сытуацыі з уцекачамі, якую выклікаў крызіс у Вэнэсуэле.
Празь дзень пасьля згаданай нарады Трамп, размаўляючы з журналістамі, заявіў, што «не кладзе пад сукно» сілавыя варыянты рэагаваньня на крызіс у Вэнэсуэле. У верасьні летась Трамп сустрэўся з многімі лацінаамэрыканскімі лідэрамі, якія прыбылі ў Нью-Ёрк на адкрыцьцё чарговай сесіі ААН. Усе яны выказаліся супраць ідэі ўзброенага ўварваньня.