У Турэччыне напярэдадні выбараў прэзыдэнта і парлямэнту, якія пройдуць у нядзелю 24 чэрвеня, праходзяць масавыя мітынгі прыхільнікаў і праціўнікаў дзейнага прэзыдэнта Рэджэпа Эрдагана.
Вядучы апазыцыйны кандыдат Мухарам Інджэ ў суботу арганізаваў масавы мітынг у Стамбуле.
Напярэдадні на акцыю ў яго падтрымку ў горадзе Ізьмір сабраліся, па розных ацэнках, ад сотняў тысяч да двух з паловай мільёнаў чалавек. Прыхільнікі апазыцыі называюць гэтую акцыю найбуйнейшай у найноўшай гісторыі Турэччыны.
Days before the presidential and parliamentary elections, Turkish President Erdogan%27s rival Muharrem Ince holds a rally attended by (depending on who you believe) hundreds of thousands/millions of people in the Aegean city of Izmir on Thursday evening. pic.twitter.com/IoALZVh4rr
— Raziye Akkoç (@RazAkkoc) June 22, 2018
Інджэ — прадстаўнік Рэспубліканскай народнай партыі, пасьлядоўнікі якой абараняюць ідэі заснавальніка сучаснай турэцкай дзяржавы Мустафы Кемаля Атацюрка. Па апытаньнях, ён адстае ад Эрдагана, аднак мае добрыя шанцы на выхад у другі тур, у якім — у выпадку аб’яднаньня апазыцыі — можа апярэдзіць дзеючага прэзыдэнта.
Сярод апазыцыйных кандыдатаў таксама Селахацін Дземірташ, якога падтрымліваюць турэцкія курды. Ён зараз знаходзіцца ў зьняволеньні.
Thousands attend Erdogan%27s pre-election rally in Istanbul pic.twitter.com/5fq8m77Vyt
— Ruptly (@Ruptly) June 19, 2018
Прыхільнікі Эрдагана таксама праводзяць масавыя акцыі па ўсёй краіне.
Прэзыдэнт Турэччыны апэлюе да свайго палітычнага вопыту, сьцьвярджаючы, што ўжо 15 гадоў прадстаўляе краіну на міжнароднай арэне. Па гэтым паказчыку — як сказаў Эрдаган на адным з мітынгаў — зь ім можа параўняцца толькі Ўладзімір Пуцін.
Прыхільнікі апазыцыі асьцерагаюцца фальсыфікацый — ва ўмовах сілавога ціску з боку ўладаў. У суботу было абвешчана аб арышце некалькіх дзясяткаў чалавек, улады заяўляюць, што яны зьвязаныя з прапаведнікам Фетхулахам Гюлэнам, які жыве ў ЗША і якога абвінавачваюць у падрыхтоўцы спробы перавароту ў 2016 годзе.