Некалькі прадстаўнікоў анархісцкага руху Беларусі паспрабавалі далучыцца да санкцыянавай уладамі акцыі з нагоды 1 траўня ў Кіеўскім сквэры ў Менску. Але ўдзельнікі акцыі адмовіліся прадставіць ім слова.
Анархісты на чале зь Вячаславам Касінеравым паспрабавалі выступіць самастойна. Двое зь іх былі ў масках. Яны разгарнулі расьцяжку «Свабода, роўнасьць, самакіраваньне» і паспрабавалі выступіць.
Любая дзяржава — гэта структурны гвалт, зь ёй трэба змагацца, — анархіст Дзядок
Вячаслаў Касінераў паспрабаваў распавесьці пра зьняволенага паплечніка Зьмітра Паліенку і пра немагчымасьць дамовы з уладамі. Аднак удзельнікі акцыі іх спынілі і перашкодзілі прамаўляць.
Пасьля таго, як група анархістаў пачала сыходзіць з Кіескага сквэру, іх затрымлі людзі ў цывільным, пасадзілі ў сіні мікрааўтобус у зьвезьлі ў невядомым напрамку. Агулам затрымана трое чалавек.
Іх даставілі ў РУУС Цэнтральнага раёна. Заўтра іх будуць судзіць.
Мітынг у гонар Міжнароднага дня салідарнасьці працоўных правёў Беларускі кангрэса дэмакратычных прафсаюзаў (БКДП). Акцыя прайшла ў Кіеўскім сквэры, у ёй удзельнічалі каля 100 чалавек.
На акцыі прысутнічала сымболіка БКДП, прафсаюзу РЭП, Беларускай партыі левых «Справядлівы сьвет» і незарэгістраванай партыі БСДП (Народная грамада).
Сярод удзельнікаў мітынгу былі кіраўнікі БКДП Аляксандр Ярашук і прафсаюзу РЭП Генадзь Фядыніч, намесьнік старшыні Беларускай сацыял-дэмакратычнай партыі (Грамада) Аляксей Сігаеў, лідэр «Справядлівага сьвету» Сяргей Калякін, сустаршыня незарэгістраванага Беларускага нацыянальнага кангрэса Мікалай Статкевіч.
За акцыяй назіралі міліцыянэры ў цывільным, у тым ліку камандзір менскага АМАПу Дзьмітры Балаба.