Адзін з заснавальнікаў «Крумкачоў» Уладзіслаў Маяроўскі ў інтэрвію Свабодзе расказаў пра пэрспэктывы футбольнага клюбу, які канчаткова страціў месца ў Найвышэйшай лізе футбольнага чэмпіянату Беларусі.
Арбітраж Беларускай фэдэрацыі футболу (БФФ) 19 сакавіка адхіліў заяву футбольнага клюбу «Крумкачы» наконт ранейшага рашэньня камітэту клюбнага ліцэнзаваньня.
На паседжаньні 26 лютага менскай камандзе адмовілі ў ліцэнзіі праз «сыстэматычныя парушэньні» патрабаваньняў рэглямэнту фэдэрацыі — парушэньне тэрмінаў падачы дакумэнтаў і зрыў працэсу ліцэнзаваньня. У звароце да заўзятараў «Крумкачы» адзначылі, што пакараныя нават не зь фінансавых прычын ці адсутнасьці дакумэнтаў — «прысудзілі да найвышэйшай меры за парушэньне тэрмінаў іх падачы». Тым часам калектыў гатовы да чэмпіянату-2018 як кадрава, так і фінансава.
Апэляцыю адхілілі 6 сакавіка. Кіраўніцтва клюбу падало заяву на арбітражны разбор, рашэньне якога канчатковае. 19 сакавіка арбітраж прызнаў прэтэнзіі «Крумкачоў» беспадстаўнымі. Такім чынам, каманда страціла месца ў эліце і ў лепшым выпадку можа заявіцца ў другую лігу ўнутранага чэмпіянату.
Дзяніс Шунто і Ўладзіслаў Маяроўскі (у цэнтры) на адным з паседжаньняў БФФ
Пра магчымае разьвіцьцё падзеяў Радыё Свабода пагутарыла з Уладзіславам Маяроўскім — разам зь Дзянісам Шунто ён быў адным з натхняльнікаў і заснавальнікаў «Крумкачоў». Праект стаў яскравай зьявай усяго беларускага спорту і вымушаны адыход у нябыт выклікаў нэгатыўныя эмоцыі ў значнай часткі адмыслоўцаў і аматараў футболу.
«Мы былі абсалютна непадрыхтаваныя да таго, што нас не пачуюць»
— Уладзіслаў, апошнія захады з боку структурных падразьдзяленьняў Беларускай фэдэрацыі футболу не пакідалі «Крумкачам» ніякіх шанцаў. Мэтанакіраваная акцыя на дыскваліфікацыю?
— Не магу сьцьвярджаць, што была нейкая сплянаваная кампанія, але нас сапраўды не пачулі. Мы прыйшлі з рэальнымі аргумэнтамі, каб даказаць арбітражнаму камітэту сваю жыцьцяздольнасьць. Не адмаўляючы факту працэдурных парушэньняў, казалі, што мера пакараньня, якую супраць нас ужылі, празьмерная і не адпавядае цяжкасьці ўчынку. Паказалі 10 эпізодаў, у якіх камітэт ліцэнзаваньня, на наш погляд, сам парушыў рэглямэнт. Мы не патрабавалі даць нам ліцэнзію, а прасілі на агульных падставах прыняць дакумэнты. З тым, каб арбітражны суд даў указаньне разгледзець наш пакет, і цягам нейкага тэрміну ліцэнзійны камітэт вырашыў бы, адпавядаем мы патрабаваньням ці не, усе крытэрыі выкананыя ці не. Мы дабіваліся толькі гэтага. На жаль, усе нашы аргумэнты праігнаравалі.
Сузаснавальнік “Крумкачоў” Уладзіслаў Маяроўскі
— Кіраўнік арбітражнага камітэту Яўген Шунтаў абгрунтаваў адмову тым, што прадстаўнікі «Крумкачоў» прыйшлі на паседжаньне нібыта абсалютна непадрыхтаванымі...
— У гэтым сэнсе ён мае рацыю — мы абсалютна не падрыхтаваліся да таго, што нас не пачуюць. Вось да гэтага дакладна не былі гатовыя. Нашы довады практычна не разглядаліся, адразу было сказана, што яны нязначныя, а калі нейкія парушэньні з боку ліцэнзійнага камітэту і былі, то непрынцыповыя. Пасьля чаго пачалі абмяркоўваць, гатовыя мы сёньня ці не гатовыя гуляць у найвышэйшай лізе. Хоць насамрэч пытаньне з нашага боку стаяла зусім інакш.
— За ўсю гісторыю існаваньня сувэрэннага футболу ў Беларусі гэта, мабыць, першы прыклад, калі каманду адхіляюць літаральна перад стартам сэзону.
— Не зусім перад стартам, бо шлягбаўм перад намі пачалі апускаць значна раней. Тым ня меней, калі гаварыць пра беспрэцэдэнтнасьць, то так. Здараліся гісторыі, калі клюбы паміралі і зьнікалі з футбольнай мапы нашай краіны, аднак гэта першы выпадак, калі тое адбылося не па волі каманды, калі кіраўніцтва клюбу заклікала пайсьці насустрач у справе допуску да працэдуры ліцэнзаваньня. Мы ня клянчылі, каб нам выдалі ліцэнзію, а проста прасілі роўных умоваў. Так, з суб’ектыўных прычынаў ня здолелі падаць усе дакумэнты своечасова. Але ж гэта ня той выпадак, каб выносіць сьмяротны прысуд.
Уладзіслаў Маяроўскі (другі справа) у “віп-ложы”
— Як ставіцеся да кансьпіралягічных вэрсій, што прынясеньнем у ахвяру «Крумкачоў» расчышчалася дарога для менскага «Тарпэда»? Аўтазаводцы занялі трэцяе месца ў першай лізе і не дацягнулі да падвышэньня ў рангу. У той жа час яны ня маюць праблемаў зь фінансаваньнем, у іх інвэстуе расейскі бізнэсовец Міхаіл Міраненкаў.
— Нешта сьцьвярджаць складана, бо нават калі дапусьціць ляяльнасьць да «Тарпэда» з боку некаторых супрацоўнікаў фэдэрацыі, ня думаю, што яна сягае аж да самага верху. Усё ж трэба быць самакрытычнымі і прызнаць, што корань праблемаў у нас саміх, у тым, што мы ня здолелі своечасова падрыхтаваць пакет дакумэнтаў, а чыноўнікі ад футболу не захацелі пайсьці нам насустрач. Усё астатняе — гэта нюансы.
— Прэтэнзіі з боку фэдэрацыі ўзьнікаюць і да іншых камандаў, але за гэтымі камандамі, як правіла, стаяць прадпрыемствы, гарадзкія і раённыя адміністрацыі. У выніку даводзіцца ісьці на саступкі, караць штрафам ці адмоўнымі ачкамі. У гэтым выпадку клюб прыватны, тылоў ня мае — значыць, прасьцей разабрацца?
— Так, былі сэзоны, калі асобныя клюбы таксама цяжка ўваходзілі ў працэс ліцэнзаваньня, літаральна за некалькі дзён да пачатку чэмпіянату атрымлівалі адпаведны дазвол. Але практычна заўсёды такім калектывам ішлі на сур’ёзныя саступкі. Чаму гэтага не адбылося ў нашым выпадку, тым больш калі справа тычылася простай фармальнасьці (мы проста прасілі, каб разгледзелі нашы дакумэнты), — пытаньне выключна да кіраўніцтва фэдэрацыі. На іх погляд, згодна з рэглямэнтам, яны такое права маюць. Нягледзячы на парушэньні, дапушчаныя самім камітэтам ліцэнзаваньня.
«Канчатковае рашэньне, ці стартаваць у другой лізе, будзе за Шунто»
— Лягічнае пытаньне: што далей? Усе інстанцыі пройдзеныя, больш абскарджваць рашэньне фэдэрацыі няма дзе...
— Шчыра кажучы, пасьля паседжаньня арбітражнага камітэту пакуль зь Дзянісам нічога не абмяркоўвалі, ня той настрой. Мабыць, нешта будзем вырашаць найбліжэйшымі днямі...
Сярод спартовых журналістаў і знаўцаў футболу
— Яшчэ летась, калі ўзьніклі фінансавыя праблемы, Дзяніс Шунто казаў, што дачаснае разьвітаньне з найвышэйшай лігай будзе азначаць сьмерць «Крумкачоў» як зьявы. І ўсё ж ці рэальна вярнуцца на старыя пазыцыі, пачаць новае ўзыходжаньне з другой лігі?
— Пачынальнікам усяго гэтага футбольнага буму вакол «Крумкачоў» быў Дзяніс Шунто. Я ягоны сябар, дапамагаў у меру сіл і магчымасьцяў. Таму канчатковае рашэньне ўсё ж будзе за ім. Так, чалавечая натура эмацыйная: калісьці падумаў, што ўсё, канец. А ў нейкі момант можа здацца, што ня так і трагічна. Калі ён вырашыць працягнуць сваё жыцьцё ў футболе, не сумняваюся, што гэта знойдзе разуменьне і падтрымку ў многіх людзей, у тым ліку ў мяне. У гэтым праекце ён быў вядоўца, астатнія ішлі за ім. Ягоны голас будзе вырашальным.
— Незадоўга да паседжаньня камітэту ліцэнзаваньня спартовай публіцы быў прадстаўлены патэнцыйны інвэстар «Крумкачоў» — армянскі бізнэсовец Ваге Мартырасьян. Ён пачаў разьлічвацца па даўгах, арганізаваў перадсэзонны збор, заявіў пра гатоўнасьць укласьці больш за паўмільёна даляраў. Ці можа яго зацікавіць другая ліга?
Уладзіслаў Маяроўскі ў пэрыяд заснаваньня “Крумкачоў”
— Ды не, тут ніякіх ілюзій няма. Ваге Мартырасьян адразу сказаў, што яму цікавая толькі найвышэйшая ліга, ніякая іншая. Адпаведна, тое, што ў сувязі з вынікамі, агучанымі фэдэрацыяй футболу, ён нас пакіне, гэта відавочна.
«Тое, што нашых заўзятараў адштурхнулі ад футболу, выклікае ня толькі жаль»
— У свой час каманда стваралася пад яскравым беларускім брэндам — адрозна ад абязьлічанай прыналежнасьці да сілавых і прафсаюзных таварыстваў і заводзкіх абрэвіятураў. Маркетынгавая, інфармацыйная палітыка на роднай мове, мясцовыя гурты на разагрэве перад матчамі. Са зьнікненьнем «Крумкачоў» страчваецца і нацыянальная адметнасьць чэмпіянату...
— Ведаеце, я вельмі люблю і шаную наш брэнд, мне ён падабаецца з усіх пазыцый. Але ў гэтым сэнсе самай вялікае расчараваньне, безумоўна, спасьцігла нашых заўзятараў, людзей, многія зь якіх палюбілі футбол дзякуючы нам. Калі выбіраліся з офісу на паседжаньне арбітражу, у ліфт падсеў малады чалавек. Пазнаў, павітаўся, пацікавіўся справамі. Пашкадаваў, што так усё завяршаецца, бо ён зь сябрамі пачаў цікавіцца футбольным чэмпіянатам Беларусі адначасова са зьяўленьнем «Крумкачоў» — наведвалі ўсе нашы матчы. А цяпер проста ў роспачы. Гэта не адзінкавы выпадак, такіх прыкладаў дастаткова. Мы ганарымся, што ў нас надзвычай адданыя, інтэлігентныя, справядлівыя заўзятары. І тое, што іх такім чынам адштурхнулі ад футболу, выклікае ня толькі жаль, але і разуменьне: нешта зроблена няправільна.
Заўзятарскі флэшмоб за ўратаваньне “Крумкачоў”
— Плюс тое непасрэдна тычыцца саміх гульцоў, трэнэраў, іх сем’яў. Ад функцыянаваньня каманды залежаць дзясяткі людзей...
— Так, натуральна. Пацярпелі футбалісты, якія рыхтаваліся гуляць у «Крумкачах» у новым сэзоне, а цяпер вымушаныя шукаць альтэрнатыву. Да апошняга спадзяваўся на разьвязаньне сытуацыі галоўны трэнэр Аляксей Кучук. Не сумняюся, што ён будзе займацца тым, што любіць і ўмее рабіць, бо зусім малады, пэрспэктыўны, разумны спэцыяліст. Ведаю, што цягам апошняга часу яму паступалі прапановы працаўладкаваньня, ён усе адкідаў, да апошняга хацеў быць з клюбам. Ну што зробіш? На жаль, скончылася менавіта такім чынам. Але тое, што Аляксей бяз працы не застанецца, — нават не сумняюся...
Чатыры гады «Крумкачоў» у дзень фактычнай ліквідацыі
Менскія аматары футболу заснавалі футбольны клюб «Крумкачы» 20 сакавіка 2014 году. Каманда пасьлядоўна прайшлі ўсе прыступкі — аматарскую другую лігу, напаўпрафэсійную першую, а ў 2016-м ужо праводзілі дэбютны сэзон у кампаніі наймацнейшых удзельнікаў чэмпіянату Беларусі.
Аднак неўзабаве паўсталі фінансавыя праблемы: «Крумкачы» аказаліся адзінымі ў элітным дывізіёне, хто ня меў дзяржаўнай падтрымкі. За імі не было ні гарадзкіх адміністрацый, ні буйных прадпрыемстваў. Дапамогі тытульных спонсараў не хапала.
Менская каманда напярэдадні сэзону-2017
Сэзон-2017 зноў пачаўся з абмеркаваньня фінансавага становішча. Пазычаныя ў БАТЭ 150 тысяч даляраў трэба было вяртаць, але зрабіць гэта ў агавораны тэрмін не ўдалося. Эканамічны суд Менску вынес рашэньне спагнаць грошы ў загадным парадку. Пачалі набірацца даўгі па заробках гульцам і трэнэрам. Летась увосень праз краўдфандынг удалося сабраць блізу 30 тысяч рублёў — чвэрць ад сумы, патрэбнай, каб скончыць першынства.
На пачатку гэтага году паведамлялася, што клюб не ўратуе ўжо нішто. І ў гэты момант знайшоўся армянскі інвэстар, які пагадзіўся ўкласьці амаль 600 тысяч даляраў, а таксама вырашыць праблему з даўгамі — пры ўмове, што каманда будзе гуляць у найвышэйшай лізе.
Аднак Беларуская фэдэрацыя футболу адмовіла «Крумкачам» у ліцэнзаваньні, усе апэляцыі засталіся незадаволеныя. Цяпер заснавальнікам давядзецца вырашаць дылему — або самаліквідавацца, або заявіцца ў другую лігу і пачаць з чыстага аркуша.
Чатыры гады ў футбольнай прасторы Беларусі
«На вялікі жаль, апошняя параза ў кабінэтах. Гэта былі цудоўныя чатыры гады. Дзякуй вам за падтрымку!», — такі разьвітальны допіс зьявіўся на афіцыйным сайце «Крумкачоў» пасьля таго, як футбольны арбітраж адмовіў клюбу ў магчымасьці выступаць у Найвышэйшай лізе ў сэзоне 2018 году.