Заснавальнік і ўладальнік прыватнага полацкага музэю савецкай атрыбутыкі «Сэнс жыцьця» Мікалай Панкрат зачыніў свой музэй для наведнікаў.
Падставай для закрыцьця стаў ператрус у доме Панкрата, які прайшоў 3 лютага. Міліцыя шукала ў калекцыянэра скрадзеныя ўзнагароды. З музэю сканфіскавалі юбілейныя мэдалі адной з вайсковых частак і некалькі знакаў «Гвардыя». Паводле Мікалая Панкрата, забраныя ўзнагароды не былі падобныя да тых, што шукалі падчас ператрусу.
Мікалай Панкрат
І хоць сканфіскаваныя рэчы Панкрату вярнулі і выбачыліся за ператрус, ён вырашыў закрыць наведнікам доступ да калекцыі.
Прыватны музэйны комплекс «Сэнс жыцьця» быў адкрыты ў 2007 годзе. На двух паверхах свайго дому Мікалай Панкрат выставіў сотні бюстаў Леніна, савецкія значкі, цацкі і радыёпрыёмнікі — усяго каля 50 тысяч экспанатаў. Уваход у музэй быў бясплатны. Паводле ўласьніка, музэй ацэньваўся ў 1,5 мільёна даляраў.