Пра гэта 18 студзеня заявіў на брыфінгу прэсавы сакратар Міністэрства замежных спраў Беларусі Дзьмітры Мірончык.
«Літаральна трохі больш за гадзіну таму ў Маскве ў МЗС адбылася сустрэча, падчас якой мы перадалі нашым расейскім калегам абноўлены праект пагадненьня. І прапанавалі ў самы бліжэйшы час правесьці ў Менску чарговую сустрэчу экспэртаў», — адзначыў Мірончык.
Праект быў скарэктаваны зь улікам падыходаў, якія сфармулявалі 11 студзеня на нарадзе ў Аляксандра Лукашэнкі аб лібэралізацыі візавага рэжыму.
«Гэта ненармальна, калі паміж дзьвюма братнімі дзяржавамі і народамі зноў аднаўляецца мяжа, якую мы з такой цяжкасьцю здымалі больш за 20 гадоў таму. Ня ведаю, каму гэта трэба», — сказаў на нарадзе Лукашэнка.
Прэсавы сакратар МЗС адмовіўся гаварыць пра зьмены ў абноўленым варыянце. Ён падкрэсьліў, што ўдзельнікі нарады ў кіраўніка дзяржавы сказалі пра гэта максымум магчымага.
«Пасьля нарады ў кіраўніка дзяржавы нашы экспэрты яшчэ раз паглядзелі тэкст, дапрацавалі, зыходзячы з сфармуляваных крытэраў. Адзін з гэтых крытэраў — зьняцьце праблем зь перасячэньнем беларуска-расейскай мяжы для замежных грамадзян, натуральна, з захаваньнем інтарэсаў Беларусі і Расеі ў галіне бясьпекі», — паведаміў афіцыйны прадстаўнік замежнапалітычнага ведамства Беларусі.
Пагадненьне, пра якое ідзе гаворка, мае форму міжурадавага пагадненьня і называецца «Аб узаемным прызнаньні візаў і іншых пытаньнях, зьвязаных з уездам замежных грамадзян і асобаў без грамадзянства на тэрыторыі дзяржаў – удзельніц дагавору аб стварэньні Саюзнай дзяржавы».
Пытаньне аб перасячэньні грамадзянамі трэціх краін беларуска-расейскай мяжы паўстала летась пасьля рашэньня Беларусі дазволіць пяцідзённы бязьвізавы ўезд для грамадзян 80 дзяржаў.