Згодна з пастановай Савету міністраў, Павал Лёгкі прызначаны намесьнікам міністра інфармацыі Беларусі. Пры гэтым ён вызвалены ад пасады саветніка-пасланьніка амбасады Беларусі ў Расеі.
Яго месца ў беларускім дыппрадстаўніцтве ў Маскве заняла Натальля Кісьлякова. Адпаведная пастанова апублікавана на ўрадавым сайце.
У журналісцкім асяродку Павал Лёгкі вядомы тым, што цягам 10 гадоў (ад 2003 да 2013-га) узначальваў прэсавую службу Аляксандра Лукашэнкі і, адрозна ад некаторых сваіх калегаў, кантактаваў з прэсай, незалежна ад яе статусу.
У верасьні Лукашэнка прызначыў прафэсійнага вайскоўца, журналіста, кіраўніка выдавецкага дому «Звязда» Аляксандра Карлюкевіча на пасаду міністра інфармацыі, якую апошнія тры гады займала Лілія Ананіч.