На пасяджэньні выканкаму Міжнароднага алімпійскага камітэту ў Лязане чакаецца абвяшчэньне рашэньня аб удзеле расейскай зборнай у зімовай Алімпіядзе-2018 у Пхэнчхане (Паўднёвая Карэя).
Напярэдадні галасаваньня самым верагодным варыянтам разьвіцьця падзей лічылася поўнае адхіленьне ад Гульняў усіх членаў зборнай Расеі і допуск да ўдзелу ў Алімпіядзе «чыстых» атлетаў, гэта значыць тых, чые імёны не зьвязаныя з вялікім допінгавым скандалам апошняга часу. У другім выпадку гаворка ішла б пра нэўтральны статус спартоўцаў — яны выступалі б пад алімпійскім сьцягам.
Расьсьледаваньне ўжываньня допінгу ўжо прывяло да драматычных наступстваў для расейскага спорту. Камісія МАК анулявала вынікі 25 атлетаў-удзельнікаў сочынскай Алімпіяды 2014 году. Расея страціла 11 мэдалёў і зь першага месца ў мэдальным заліку апусьцілася на шостае. Некалькі расейскіх спартоўцаў дыскваліфікаваныя пажыцьцёва.