Цэнтар падкантрольнага сэпаратыстам Луганску далей блякуюць узброеныя людзі. Пра гэта паведамляюць супрацоўнікі маніторынгавай місіі АБСЭ на ўсходзе Ўкраіны. Назіральнікі пры гэтым адзначаюць, што сытуацыя ў горадзе «ў цэлым спакойная».
Кіраўнік самаабвешчанай «Луганскай народнай рэспублікі» Ігар Платніцкі вечарам у сераду заявіў, што тое, што адбываецца ў Луганску — гэта спроба ўзброенага перавароту, арганізаваная адхіленым ад пасады так званым міністрам унутраных спраў «ЛНР» Ігарам Карнетам. Пры гэтым, як сьцьвярджае Платніцкі, у Карнета не атрымалася захапіць уладу і «ў бліжэйшы час у гэтай справе будзе пастаўлена кропка».
Лідэр сэпаратыстаў «ЛНР» таксама абверг зьвесткі, якія зьявіліся раней у СМІ, аб тым, што ён зьбег у Расею. Паводле іншых дадзеных, Платніцкага разам з жонкай, кіраўніком яго адміністрацыі і аховай утрымліваюць у падвале. Пацьверджаньня гэтай інфармацыі няма.
20 лістапада Платніцкі адправіў Карнета ў адстаўку. Кіраўнік МУС «ЛНР» адмовіўся падпарадкоўвацца. 21 лістапада цэнтар Луганску занялі узброеныя людзі без апазнавальных знакаў. У сераду яны штурмам узялі будынак пракуратуры «ЛНР» і захапілі яе кіраўнікоў. Перад гэтым у Луганск прыбылі некалькі дзясяткаў грузавікоў з сэпаратыстамі самаабвешчанай «Данецкай народнай рэспублікі», аднак пра іх удзел у канфлікце Платніцкага з Карнетам пакуль нічога невядома. Лідэры сэпаратыстаў «ДНР» не камэнтавалі тое, што адбываецца ў Луганску.
Прэс-сакратар прэзыдэнта Расеі Дзьмітрый Пяскоў у сераду заявіў, што Крэмль сочыць за сытуацыяй у «ЛНР». На пытаньне аб тым, ці ведае Масква, хто стаіць за абвастрэньнем абстаноўкі ў самаабвешчанай рэспубліцы, Пяскоў адказаў: «Разуменьне ёсьць».
Больш падрабязна пра спробу перавароту ў Луганску чытайце тут