21 кастрычніка ў Вільні ўдзельнікі ІV Беларускага праваабарончага форуму прынялі рэзалюцыю пра сытуацыю з правамі чалавека ў Беларусі.
У ёй адзначаецца, што ад моманту правядзеньня папярэдняга форуму ў кастрычніку 2013 году ў Беларусі назіраюцца «пэўныя пазытыўныя крокі ў галіне правоў чалавека, аднак у цэлым сытуацыя істотна не зьмянілася».
Алесь Бяляцкі і Жана Літвіна
Праваабаронцы заклікаюць беларускія ўлады
– зрабіць дзейсныя захады для забесьпячэньня належнай абароны правоў чалавека і выкананьня міжнародных абавязкаў у галіне правоў чалавека, добраахвотна ўзятых на сябе Рэспублікай Беларусь;
– не дапускаць выпадкаў крымінальнага перасьледу грамадзян па палітычных матывах;
– спыніць раней пачатыя палітычна матываваныя крымінальныя справы і вызваліць усіх палітвязьняў;
– спыніць перасьлед грамадзянаў у сувязі з рэалізацыяй імі правоў і свабодаў, гарантаваных канстытуцыяй краіны і міжнароднымі абавязкамі ў галіне правоў чалавека.
Удзельнікі форуму
У сваёй рэзалюцыі праваабаронцы, сярод іншага патрабуюць спыніць крымінальны перасьлед абвінавачаных у справе «пра стварэньне незаконнага ўзброенага фармаваньня» і актывістаў незалежнага прафсаюзу РЭП.
Таксама не дапускаць ціску на журналістаў і праваабаронцаў, зьняць забарону на ўезд у Беларусь праваабаронцы Алене Танкачовай, зарэгістраваць праваабарончы цэнтар «Вясна і адмяніць артыкул 193.1 Крымінальнага кодэксу (дзейнасьць ад імя незарэгістраванай арганізацыі).
Алена Танкачова
Праваабаронцы заклікаюць улады ўвесьці мараторый на сьмяротнае пакараньне, спыніць умяшальніцтва ў дзейнасьць адвакатуры і практыку прымяненьня прымусовай працы, запрасіць ў краіну спэцдакладчыка ААН па сытуацыі з правамі чалавека ў Беларусі.
Сярод 16 патрабаваньняў да ўладаў – «забясьпечыць рэальную роўнасьць абедзьвюх дзяржаўных моваў у дзяржаўных інстытуцыях, у тым ліку праз выданьне актаў заканадаўства ня толькі на расейскай, але і на беларускай мове».
Аўтары рэзалюці рэкамэндуюць міжнароднай супольнасьці «трымаць пытаньне выкананьня Рэспублікай Беларусь правоў чалавека ў фокусе ўвагі пры выбудоўваньні міжнародных адносін паміж Эўразьвязам і Беларусьсю, а таксама іншымі краінамі».
А таксама прыцягваць беларускіх праваабаронцаў да дыялёгу па правах чалавека па лініях ЭЗ–Беларусь і ЗША–Беларусь.
За рэзалюцыю прагаласавалі прадстаўнікі 29 праваабарончых арганізацый, якія бяруць удзел у форуме.
Таксама праваабаронцы прынялі заяву, у якой рашуча пратэстуюць супраць прэвэнтыўных затрыманьняў актывістаў напярэдадні акцыі «Марш абураных беларусаў», якая ладзілася 21 кастрычніка 2017 году ў Менску.
***
Самыя галоўныя і цікавыя навіны можна атрымліваць адразу ж, падпісаўшыся на Тэлеграм-канал Радыё Свабода.