У селішчы Гар-Адар на Заходнім беразе ракі Ярдан узброены палестынец застрэліў двух ахоўнікаў і байца памежнай паліцыі, цяжка параніў яшчэ аднаго чалавека.
Паліцыя разглядае напад як тэрарыстычны акт.
Паводле дадзеных паліцыі Ізраілю, узброены чалавек падышоў да вайскоўцаў разам з групай палестынцаў, якія працуюць у паселішчы.
Ён выклікаў падазрэньне ахоўнікаў, якія спынілі яго для дагляду. У гэты момант ён выхапіў пісталет і практычна ва ўпор пачаў страляць. Супрацоўнікі ізраільскіх сілаў бясьпекі некалькі разоў стрэлілі ў нападніка, пазьней ён памёр ад ранаў.
Паводле ізраільскіх СМІ, гэта 37-гадовы бацька чацьвярых дзяцей з дазволам на працу ў Ізраілі.
Рух ХАМАС заявіў, што гэты напад — новы этап інтыфады, узброенай барацьбы супраць Ізраілю.